PM hnenah Seoul Peace Prize hlan

South Korea-a cham mek, Prime Minister Narendra Modi-a hnenah nimin khan South Korea chuan chawimawina, Seoul Peace Prize 2018 a hlan. 

He chawimawina hi ram hrang hrangte thawhhona ṭha siamna leh economic lama hmasawnna tura a thawhhlawk avangin Modi-a hnenah Seoul Peace Prize Foundaton chuan a hlan a ni. 

Chawimawina hlanna inkhawmah hian Modi-a chanchin leh a hnathawh kawng a hlawhtlinna short film tihchhuah nghal a ni. Chawimawina hlantu, award committee chuan India hmasawnna leh khawvel pum economy ṭhanna kawnga Modi-a hnathawh leh a thawh hlawk dante an hriatpui tih sawiin, mi hausa leh retheite inkar zau lutuk tireh tura a hnathawh chu fakawm an tih thu an sawi. 

PM Modi hi Seoul Peace Prize dawngtu 14-na a ni a, he chawimawina dawng tawh zingah hian UN Secretary General hlui Kofi Annan, German Chancellor Angela Merkel leh international relief organization Doctors Without Borders leh Oxfam-te pawh an tel. Chawimawina hian thuziak bakah pawisa fai dollar 200,000 a keng tel a ni. 

PM Modi chuan chawimawina hlan a ni chu lawmawma tih thu sawiin, award chu ama ta bil niloin India mipuite ta, kum nga kalta chhunga India mipui tluklehdingawn 1.3-te avangin India-in hlawhtlinna a neihna vang a ni, a ti. Pawisa fai a dawn chu Namani Gange fund atan a thawh nghal bawk.