Congress-in Amit Shah bang turin phut

Delhi buaina chhuaka mawhphurtuah Congress chuan sorkar laipui leh Delhi sorkar chu puhin, Union home minister Amit Shah chu bang turin an phut.

Congress-a thutlukna siamtu committee pawimawh ber Congress Working Committee (CWC) chuan nimin khan meeting neiin, Delhi chief minister Arvind Kejriwal leh a sorkar chu mipuite tharum thawh lo tura an biak loh avangin mawhphurtuah a puh bawk.

Meeting an neih zawh hnu hian, "Thil awm dan kan thlir hnuah, CWC chuan ngaihdan tichiangin Delhi-a thil thleng hi tihtur tih lohna avanga chhuak a ni tih kan pawm a, mawhphurna zawng zawng chu sorkar laipuiin a la tur a ni a, a bik takin home minister chu mawh phurtu a ni a, a rang thei ang bera bang turin kan phut a ni," tiin thuchhuah an siam.

CWC meeting hi Congress president Sonia Gandhi chuan a kaihruai a, prime minister hlui Manmohan Singh leh party hruaitu hlun- AK Antony, Ghulam Nabi Azad, Priyanka Gandhi Vadra leh Jyotiraditya Scindia-te pawh an tel.