PM Modi-a'n PM-KISAN scheme a tlangzarh

Prime Minister Narendra Modi chuan nimin khan Uttar Pradesh-a Gorakhpur-ah sorkar laipui flagship scheme, Pradhan Mantri Kisan Samman Nidhi (PM-KISAN) a tlangzarh. PM-KISAN scheme atan hian cheng vaibelchhe 75,000 ruahman a ni. 

PM-in scheme thar a tlangzarh hnuaiah hian ramchhunga loneitu, mi vaibelchhe 12 vel chu kum khatah Rs 6,000 pek tum an ni a, hei hi ṭum thuma pek an ni ang. 

Narendra Modi chuan he scheme hian BJP kaihhruai sorkar laipui chuan loneitute dinhmun a ngaihtuah zia a tilang niin a sawi. He scheme hnuaia sum sem tur hi loneitu, ram hectare hnih aia zim neiten an dawng thei dawn a ni. February 1-a Interim Budget a pharh ṭum khan Finance Minister Piyush Goyal chuan scheme thar siam tur hi a lo puang tawh a ni. 

Sorkar laipui chuan scheme tlangzarh ni, nimin khan loneitu vaibelchhe khat vel chuan first instalment, Rs 2,000 an dawng nghal tih a sawi. 

PM chuan he scheme kalpuina tur hian a karah midang inrawlh an awm loh avangin khawih chingpen theih a ni lo tih a sawi. Loneitute puala pawisa tur chu tumahin an laksak dawn lo a ni, a ti. He scheme hnuaia sum sem tur hi sorkar laipui tum vek tur a ni a, mahse state sorkarte chu an state chhunga hamṭhatna dawng thei tur loneitu list thehlut tura hriattir an ni. 

Hetihlai hian eptu pawlte chuan Lok Sabha inthlanpui neih dawn hnaihah sorkar laipuiin hmanhmawh taka scheme a tlangzarh chu sawisein, Congress hruaitu hlun P Chidambaram-a chuan vote hmuhna tura thamna a ni, a ti. Election Commission in sorkar laipuiin vote zawnna tura ruahmanna a siam a dang thei lo chu thil zahthlak tak a ni tih a sawi bawk.  

Modi hian nimin vek han thla tina radio programme a hman ṭhin, 'Maan ki Baat' vawi 53-na a hmang bawk. Radio-a thu a sawiah, PM chuan Pulwama-a firfiak pawikhawihna thleng chungchang sawichhuakin, sipai thite zahna a hlan a, ram tana an inpekna chuan India ram a tichak zual dawn a ni, a ti. He pawikhawihna thleng hian mipuite thin pawh a tiur hle a, mahse heng thinurnate hi firfiaka chetna thleng ṭhin tihtawpna tura hman thiam a ngai tih a sawi. 

PM chuan India-in National War Memorial a nei lo chu mak a tih thu leh pawi a tih th a sawi a, sipai huaisen, ram tana nunna hlantute hriatreng leh chawimawina hmun chu he ramah hian a awm ngei a ngaih thu a sawi.