Aero Show neihnaah kangmei chhuak

Bengaluru-a Air show, Aero India 2019  neihna hmuna parking lot-ah kar kalta Inrinni khan kangmei a chhuak a, motor 300 dawn a kang. 

Kangmei chhuahna hi Bengaluru hmarlama Yelahanka Air Force Station bul niin, official-te chuan cigarette bung tihhlum loa paih aṭanga chhuak nia a lan thu an sawi. Khua a ro vang leh thli a thawh avangin kangmei hi a kangkai chak hle a ni. Fire Brigade, Rapid Action Force leh National Disaster Response Force (NDRF) team te chuan minute 40 hnuah kangmei hi an ṭhelh mit thei a ni. 

Defence Ministry chuan kangmei chhuah chhan hi chhui chiang turin thupek a tichhuak nghal a ni. 

Ni nga awh tur Aero India 2019 hi kar kalta Ningani aṭang khan neih ṭan a ni. Show neih hma nia Suryakiran Aerobatic Team-in rehearsal an neihnaah thlawhtheihna pahnih chu boruakah an insu a, pilot pakhat a lo thi tawh bawk a ni. 

Defence Minister Nirmala Sitharaman-i chuan nimin khan kangmei chhuahna hmun hi a tlawh a, Indian Air Force official, DG Fire Services leh Disaster Management Team hotute nena thil awmdan an lo sawipui a ni.