Delhi CM-in chaw ngheia nawrh huaihawt dawn

Delhi Chief Minister Arvind Kejriwal chuan Lok Sabha inthlanah an party, Aam Aadmi Party (AAP) in Delhi-a seat awm an lak vek theih chuan kum hnih chhungin Delhi chu state puitlinga siam a lo tiam tawh a, hemi hnu hian March 1 aṭangin tiam chin awm loa chaw ngheia nawrh huaihawt a tum thu a sawi leh. 

Kejriwal-a chuan, "Ram pumah democracy kalpui a nih laiin Delhi-ah erawh chuan a ni ve lo. Mipuiten an vote hmangin sorkar tur an thlang chhuak a, mahse sorkar chuan thuneihna a nei ve thei lo. Hei vang hian March 1 aṭangin Delhi-ah democracy kalpui a nih ve theihna tur leh, state puitlinga hlankai phutin tiam chin awm loin chaw ka nghei dawn a ni", a ti. A thil phut tihhlawhtling tur hian thih pawh a inhuam tih a sawi bawk.

Delhi hi state puilting a nih loh avangin city goverment hian thuneihna pumhlum a nei ve lo a ni. Land, law and order leh police-te chu sorkar laipui thuneihna hnuaiah an awm a ni. Kum 2016 khan Delhi sorkar chuan Delhi chu Union Territory a nih avangin thuneihna chu Delhi sorkar kutah ni loin sorkar laipui  kuta awm niin a sawi a, hei hi AAP sorkar chuan a lo khing let tawh a ni.