Union Minister-te portfolio tlangzarh Cabinet Meeting hmasa ber nei nghal

Ningani zan khan sorkar laipuia Bhara­tiya Janata Party (BJP) kaihhruai NDA sorkara union minister turte chuan President Ram Nath Kovind-a kaihhruaina hnuaiah rinawmna thu an tiam a, nimin khan an portfolio tur tlangzarh nghal a ni. Nimin vekah khan cabinet meeting hmasa ber an nei nghal bawk.

Prime Minister Narendra Modi hian Ministry of Personnel, Public Grievances and Pensions, Department of Atomic Energy, Department of Space-te a chang a, policy issue pawimawh zawng zawng leh Minister dangten an chan loh portfolio awm thei dang zawng zawng a chang a ni.

Mi tam takin an rinlawk ang ngeiin Amit Shah chuan Ministry of Home Affairs a chang a, ani hian a ṭumkhat nan Cabinet Minister dinhmun a luah a ni. Amit Shah leh Modi hi Union Minister turte ruat chungchangah ṭum thum ngawt an inrawn. 

Term hmasaa Home Minister Rajnath Singh chu Union Defence Minister atan ruat a ni a, Nitin Gadkhari chu Road Transport & Highways, Micro, Small and Medium Enterprises Minister a ni bawk a, Defence Minister hlui Nirmala Sitharaman-i chuan Finance Ministry a chang thung. Sawi hmaih loh tur zinga mi, 'Giant Killer' an tih, Amravati biala Congress chief Rahul Gandhi hnehtu Smriti Irani-i chu Women and Child Development leh Textiles Minister atan ruat a ni. List kimchang chu phek hmaah tarlan a ni.

17th Lok Sabha Union Cabinet-ah hian cabinet minister 25 an awm a, minister of state indenpendent charge nei pakua awmin, Minister of State (MoS) 24 an awm.  Uttar Pradesh aṭangin Union Minister 10 an awm a, Maharashtra aṭangin pasarih awm bawkin Bihar aṭangin paruk an awm bawk. Gujarat, Rajasthan, Haryana leh Karnataka aṭangin pathum ṭheuh an awm a ni.West Bengal, Odisha leh Madhya Pradesh aṭangin pahnih ṭheuh an awm bawk a ni.

Council of Minister tharah hian state zawng zawng deuhthaw aṭangin Minister an awm a, Andhra Pradesh, Nagaland, Manipur, Mizoram, Sikkim leh Tripura-te erawh chuan an nei lo thung. A ṭumkhat nana council of minister-a tel mi 19 an awm a ni.

Nimin tlai lamah khan Cabinet meeting hmasa ber an nei nghal a, mahse he thu ziah lai hian meeting thuchhuah hriat hman a ni lo. 

Modi-a council of minister  zingah hian term hmasa lama minister eng awm zat chu tun ṭumah hian thlauhthlak an ni a, chung zingah chuan Arun Jaitley leh Sushma Swaraj-i te pawh an tel.

Arun Jaitley hi NDA sorkar term hmasaah khan Finance Minister a ni a, dinhmun pawi­mawh tak a luah. Amah­erawhchu, a hriselna dinhmun ṭhat loh avangin PM Modi-a hnena mawhphurhna a neihte chu chu dah a dil a, thla 18 vel zet a chawl a ni.

Jaitley hian Modi-a kaihhruai sorkar hmasaah khan chanvo pawimawh tak a chelh a mah se a hriselna dinhmun ṭhat loh vangin cabinet minister zinga telh lo tur hian Modi hnenah a ngen hial a, telh a ni ta lo a ni.

Term hmasaah khan External Affairs minister a ni a, tun ṭumah erawh minister zingah a tel lo. Kum 67 mi Sushma Swaraj-i hi Prime Minister atana Narendra Modi lakluh a nih lai pawhin mipui lamah a ṭhu a, BJP kaihhruai NDA sorkarah cabinet minister a ni dawn ta lo a ni. 

Olympian Rajyavardhan Rathore hi term hmasa lamah khan a langsar viau a, amaherawhchu, phone-call dawng zingah a tel lo. Kum 49 mi Rajyavardhan Rathore hi council of minister zingah tel lo mah se Indian politician zinga hmabak nei eng berte zinga mi a ni. 

 

Term hmasaah khan Minister of State for Civil Aviation a ni a, Finance Ministry-ah Minister of State charge a la bawk. He mi hnu hian aviation ministry-ah chanvo pawimawh tak a chelh zui bawk. Kum 56 mi Jayant Sinha hi a ṭum hnih nan Jharkhand-a Hazaribagh bial aṭangin thlan tlin ni mah se council of minister zingah a hming a lang ta lo a ni. 

Maneka Gandhi hi Lok Sabha-ah interim speaker te pawh lo ni tawh a ni a, Women and Child Development a lo enkawl tawh bawk. Kum 62 mi Maneka Gandhi-i hi tun ṭerm-ah erawh MP fang a nih a ngai dawn thung. 

Health and Family Welfare minister hlui Jagat Prakash Nadda hi union cabinet minis­ter zingah a tel lo a, Himachal Pradesh tan channa a ni ngei ang. Modi-a'n cabinet atana kum lama naupang zawk leh senior politician a remkhawm zingah a hming a lang lo a ni. 

Prime Minister Narendra Modi hian a council of minister atan hian kum upa leh naupang zawkte a chawhpawlh a, chung zingah chuan term hmasa lama minister ṭhenkhat chu thlauhthlak an ni.