Bihar CM-in a cabinet-ah mi 8 lakluh belh BJP tan seat pakhat chiah a pe

Bihar chief minister Nitish Kumar chuan a cabinet a tilian a, Pathianni khan minister atan JD(U) member pariat a lakluh belh a, BJP tan seat pakhat pek ve a ni tih a sawi bawk. 

Nitish Kumar hi union cabinet zingah an party MP pakhat chiah telh tura hlui a nih avangin a lungawi lo hle a, hemi avang hian a cabinet zingah pawh hian BJP tan seat pakhat chiah a dah nia sawi a ni. Mahse amah chuan thinrimna a nei lo tih sawiin, JD(U) chu NDA zinga mi an la ni reng tih a sawi.

Union cabinet din a nih dawn khan JD(U) hian minister pahnih an neih an inbeisei nia sawi a ni a, Cabinet rank-ah pakhat leh minister of state-ah pakhat ve ve neih an inbeisei niin an sawi. A cabinet tihlena BJP tan seat khat chiah a dah avang hian BJP lakah a lungawi lo hle nia sawi a ni. Mahse Nitish Kumar chuan BJP leh an party chu an la thawhdun reng thu leh an inkarah boruak chhia a awm lo tih a sawi thung.

Media ṭhenkhat chuan Amit Shah-a'n Modi-a cabinet-ah JD(U) member pakhat dah a tumna chu Nitish Kumar hian a hnawl tih an tarlang ve bawk a ni. Bihar Cabinet Minister atana lakluh tharte hi - Narendra Narayan Yadav, Shyam Rajak, Ashok Chou­dhary, Bima Bharti, Sanjay Jha, Ram Sewak Singh, Niraj Kumar leh Lakshmeshwar Rai-te an ni a, Pathianni khan Raj Bhavan-ah Governor Lalji Tandon chuan rinawmna thu tiam tirin a lalut a ni.