Population Control Law chungchangah sorkar laipui hriattirna pe

Delhi High Court chuan ramchhunga mihring pung chak lutuk venna atana population control law hmang tura Public Interest Litiga­tion (PIL) thehluh chung­changah sorkar laipui chu hriattirna a pe a, hma a lak dan hrilh turin a ti. Petition hi BJP leader Ashwini Kumar Upadhyay-a thehluh a ni. 

Mihring pung chak lutuk chu pawikhawihna thleng hluarna chhan te, pollution nasat chhan leh hna leh resource indaih lohna pakhat a nih thu a sawi. Hei vang hian mihring pung chak lutuk tur venna tura Justice Venkatchaliah-a kaihhruai National Commission to Review the Working of the Constitution (NCRWC) in rawtna a siamte chu a taka kalpui turin a ngen a ni. 

NCRWC hian kum 2002, March 31 khan Atal Bihari Vajpayee-a prime minister laiin report kimchang hi a lo thehlut tawh a ni. Report-ah hian mihring pung chak venna tura state-in fa pahnih chin neih phalna dan siam te, sorkar hna lakna, hamṭhatna dawngtu tur leh dikna chanvo hrang hrangah pawh bithliah siamte an rawt. 

Delhi High Court-a petition thehluttu hian NCRWC rawtna lo siam tawhte hi a taka hman an phut a, thla tina Pathianni hmasa ber chu 'polio day' tih aiah 'health day' atana puang turin sorkar an ngen bawk. Hemi ni hi mihring pung chak lutukin harsatna a thlen theih dante in­hrilhriatna atana hmang turin a ti bawk a ni.