Mi 13 chuanna IAF AN-32 aircraft Chin hriat lohin a bo, a zawn hna thawk nghal

Indian Air Force transport aircraft AN-32 chu nimin khan Assam aṭangin a thlawk chhuak a, a hnu lawkah chin hriat lohin a bo zui. He aircraft-ah hian crew member mi pariat leh passenger mi panga, an vaiin mi 13 an chuang a ni. 

IAF AN-32 aircraft hi chawhnu dar 12:25 khan Assam-a Jorhat aṭangin Mechuka Advance Landing Ground, Arunachal Pradesh panin a thlawk chhuak a, dar 1:00pm velah chuan biak pawh theih an ni tawh lo. An bona hi China border hnaih a ni a, Indian Air Force chuan a zawn hna hi an thawk nghal a ni. AN-32 aircraft zawn nan hian Sukhoi-30 combat aircraft leh C-130 Special Ops aircraft -te tirh chhuah nghal an ni a, he thu buatsaih lai hian chanchin kimchang hriat hman a ni lo. 

He thil thleng chungchangah hian Defence Minister Rajnath Singh chuan Indian Air Force Vice Chief, Air Marshal R K S Bhadauria a biak tawh thu sawiin, a zawn hna ngawrh taka thawh a nih thu a sawi. Hetih rual hian Mechuka area hi ramngaw chhah tak a nih avangin a zawn hna hi chak taka kalpui a harsat thu tarlan a ni. 

Chung lam aṭangin Helicopter hmanga zawn a ni a, Indo-Tibetan Border Police-te chuan lei lamah a zawn hna hi an thawk bawk a, hnuhma hmuh tur erawh a la awm lo. Indian Air Force transport aircraft AN-32 hi kum 2016 khan Bay of Bengal-ah a lo bopil hmak tawh bawk a, mi 29 chuanna hi tun thlengin a chin hriat a la ni lo.