PM Modi fak vangin Kerala Congress-in MLA hlui an ban

Kerala-a Kannur MLA hlui, Abdullakutty chuan a facebook post-ah Prime Minister Narendra Modi chu fakin, hmasawnna project Ujjwala Yojana leh Swacch Bharat-te hmangin 'Gandhian' hlutna a tihlar avangin fakawm a tih thu a post. 

A development agenda leh an sorkar strategy-te avangin hnehna an chang tih a tarlang bawk a, Modi-a tilartu em em pakhat chu a sorkarna hnuaiah 'Gandhian' hlutna a tihlar vang a ni, a ti. He thu a post hnu lawk hian Kerala-a Congress hruaitute chuan nasa takin an sawisel chhunzawm nghal a, insawifiah turin an phut bawk a ni. Congress media 'Veekshanam' phei chuan an editorial-ah Abdullakutty chu sava insawn ching, thu­neihna duh tiin an sawisel hial a, party aṭanga ban an phut thu an ziaklang bawk.

Hemi avang hian insawi­fiah mah se party hruaitute chu a hmin zo lo a, party aṭangin an ban ta a ni. Mi ṭhenkhat chuan BJP a zawm dawn tih an sawi a, Manjeswaram constituency by-election neih turah a ding dawn nia sawite pawh an awm bawk.

Party aṭanga hnawh­chhuah a nih hnua thuthar thehdarhtuten an kawmnaah Abdullakutty chuan Congress chu an la inchhir dawn tih a sawi a, thuneihna chu a duh a nih ngai loh thu leh hmasawnna duh mi a nih thu a sawi.

Abdullakutty hi CPM Lok Sabha MP ṭhin a ni a, 2009 khan Congress hi a zawm a ni.