Coronavirus vaccine enchhin turin thawn

United State-a dam­dawi siamtu, Moderna chuan coronavirus vaccine atana hman theih tura beisei, an damdawi siam chu enchhin turin sorkar hnenah an thawn ta. 

Biotech company hian kar ruk chhung an siam hnuah, coronavirus vaccine mRNA01273 tih chu Thawhlehni khan enchhin turin National Institute of Allergy and Infec­tious Diseases hnen­ah vial an thawn tih an sawi.

Moderna damdawi siam hi volunteer mi 25-te taksaah enchhin a ni dawn tih Wall Street Journal chuan a tarlang. He hi a hlawhtling a nih pawhin test dang neihpui leh niin, mipuite hman theih tura phochhuah a nih hmain thuneitu lamin an pawmsak a ngai leh phawt dawn a ni. 

Coronavirus, Covid-19 a len hnuah khawvel ram hrang hranga heath official leh pharmaceutical company-te chuan a enkawlna tur leh vaccine siam tumin theihtawp an chhuah mek hlawm. Moderna bakah hian damdawi siamtu company lian, Johnson & Johnson (JNJ) leh Glaxo­SmithKline (GLAXF) pawhin vaccine siam tumin an bei mek bawk. 

Covid-19 vang hian nimin thleng khan khawvel pumah mi 2,700 chuang an thi tawh a, he hri kai finfiah tawh hi mi 80,000 an tling tawh bawk. Iran deputy health minister Iraj Harirchi chuan nimin khan Covid-19 a kai tih TV-ah sawiin, enkawl nghal a nih thu a sawi a, Iran mipuite chu hri leng laka inveng fimkhur turin a chah nghal bawk. 

Nimina sorkar hrang hranga health official-ten an rama Covid-19  kai leh he hri leng vanga thi zat an tarlan chu - 

Mainland China :     Hri kai 78,064 (Thi 2,715 )

Hong Kong :    Hri kai 81 (Thi - 2)

Macao :     Hri kai 10

South Korea :      Hri kai 1,146 (Thi - 11)

Japan :     Hri kai 860 ( Thi - 4)

Italy :     Hri kai 323 (Thi - 11)

Iran :     Hri kai 95 (Thi -15)

Singapore :     Hri kai 91

Thailand :     Hri kai  37

United States :     Hri kai 57

Taiwan :     Hri kai 31 (Thi - 1)

Australia :     Hri kai 23

Malaysia :     Hri kai 22

Bahrain :     Hri kai 17

Vietnam :     Hri kai 16

Germany :     Hri kai 17

UAE :     Hri kai 13

UK :      Hri kai 13

France :     Hri kai 14 ( Thi -1)

Canada :     Hri kai 11

Kuwait :     Hri kai 11

Philippines :     Hri kai 3 (Thi - 1)

India :     Hri kai 3

Spain :     Hri kai 6

Russia, Israel, Oman leh Austria ramah Covid-19 kai hi mi pahnih ṭheuh hmuh an ni tawh a; Belgium, Nepal, Sri Lanka, Sweden, Cambodia, Finland, Egypt, Algeria, Afghanistan, Croatia leh Switzerland ramah mi pakhat ṭheuh hmuh an ni tawh bawk.