State/UT 24-ah Covid-19 vanga thi awm lo President Ram Nath Kovind-a'n vaccine la
Union health ministry chuan Thawhlehni khan ram chhunga state leh Union Territory 24-ah Covid-19 vanga thi an awm lo tih a sawi.
Thawhlehni ram khan ram pumah coronavirus hri kai thar hi mi 14,989 awmin, hemi ni vek hian hri vanga thi mi 98 an awm. Covid-19 vanga thi zinga 88.78% chu state pali ami niin, Maharashtra-ah an tam ber a, mi 54 in an thihpui. Kerala-ah mi 16 leh Punjab-ah mi 10 an thi bawk.
Hemi ni veka hri kai enkawl dam zinga 86.58% chu state paruk ami an ni bawk a, Maharashtra-ah enkawl dam thar hi tam ber bawkin mi 6,332 an awm. Kerala-ah mi 3,512 leh Tamil Nadu-ah mi 473 chu Thawhlehin khan enkawl dam an ni bawk a ni.
January 16 aṭang khan ram pumah Covid-19 vaccine pek chhuah ṭan niin, Thawhlehni thleng khan 67,42,187 Health Care Worker (HCW) (1st dose), 27,13,144 HCW (2nd dose), 55,70,230 Front Line Worker (FLW) (1st dose) leh 834 FLW (2nd Dose), bakah kum 45 chunglam natna benvawn nei mi 71,896 leh kum 60 chung lam mi 5,22,458 hnenah vaccine hi pek a ni tawh.
Private hospital-te vaccine pek phalsak vek
Sorar laipui chuan private hospital zawng zawngte chu dan siamte an zawm a nih chuan Covid-19 vaccine an pek chhuah a phalsak vek tih Thawhlehni khan a sawi.
State leh UT sorkar-te hnenah hospital tin, sorkar leh private hospital-ahte Covid-19 vaccine a awm tam tawk em tih enfiah zel turin a chah. Vaccine pek hna chu chak zawka kalpui a nih theihna turin hun bithliah a siamte pawh a titawp a, vaccine la turte chuan eng hunah pawh, an remchan hunah vaccine hi an la thei reng tih a sawi a ni.
President-in Covid vaccine la
President Ram Nath Kovind chuan Thawhlehni khan Covid vaccine dose hmasa zawk a la ve ta a, vaccine a lak zawh hnuah India ram mipui vaccine la thei zawng zawngte chu la ve turin a sawm nghal bawk.
Kum 75 mi Ram Nath Kovind chuan twitter kaltlangin vaccine a lak thu hi a puang a, Army Research and Referral Hospital, Delhi-ah vaccine a la tih leh, a fanuin a kalpui tih a tarlang a ni. President chuan doctor, nurse, health worker leh administrator zawng zawngte chu khawvel chanchina vaccination drive lian ber an kalpui theih avangin lawmthu a hrilh a, India khua leh tui, a thei zawng zawngte chu vaccine la turin a ngen.