Ram Temple Trust-in thawhhlawm Rs vbc 2,100 hmu

Shri Ram Janmbhoomi Teerth Kshetra Trust chuan Uttar Pradesh-a Ayodhya hmuna Ram Temple sakna turin thawhhlawm, cheng vaibelchhe 2,100 chuang an hmu tawh. 

January 15 aṭang khan Trust hian ni 44 awh tur ram puma fund-rasing campaign kalpuiin kar liam ta Inrinni khan a tawp a ni. Fund raising campaign aṭang hian cheng vaibelchhe 1,100 vel hmu tura an inbeisei laiin, an beisei zat hi cheng vaibelchhe 1,000 in an khum a ni. 

Trust treasure Govind Dev Giri chuan mi chi hrang hrang hnen aṭangin temple sakna tur thawhlawm hi an dawng tih a sawi a, thawhlawm petu zingah hian thingtlang kilkhawr tak tak amite pawh an tel niin a sawi. Nikum December thla khan Giri hian temple sakna atan bik Rs vbc 300-400, leh a complex pum sakna atan Rs vbc 1,100 vel a ngai dawn niin a sawi tawh a ni. Mahse mamawh tur zata an ruahman aia tam daih sum an hmuh tak avangin heng sumte hi Ayodhya tihhmasawnna atana hman tel turin Trust hi ngen an ni. Hetih lai hian trust member zinga mi, Dr Anil Mishra chuan temple sakna tur budget hi tihfel a la ni lo tih a sawi a, a ṭul dan azirin thawhlawm pawh hi khawn belh a la ngai zawk maithei a ni, a ti. 

Treasurer Giri pawhin fund-raising campaign hi ram chhungah chauh neih a ni a, India ram pawna cheng Ram Bhakts-te chuan ram pawn lamah pawh thawhlawm hi khawn ve tura an ngen nasat thu sawiin, hemi chungchang hi an la ngaihtuah leh dawn tih a sawi a ni. Nikum September thla khan Trust hian sorkar laipui hnenah foreign donation dawn phalsak turin a lo dil tawh a ni.