Pulwama attack : CCTV footage-ah bomb ti-puaktu motor khalh lai lang

National Investigation Agency (NIA) chuan February 14-a Jammu and Kashmir-a Pulwama district-a Central Reserve Police Force (CRPF) convoy beih a nih chungchang a chhui zui mek a, CCTV footage-ah thihchilh bomb tipuaktuin a motor hman, Eeco car sen leh a khalh lai thlate hmuhchhuah thar a ni. 

He video hi motor-a bomb phurtuin CRPF sipaite chuanna bus su a, a bomb phurh a tihpuah hma lawka lak a ni. He pawikhawihna thlengah hian sipai 40 in nunna an chan a ni. 

NIA in a tarlan danin, CCTV footage-ah hian bomb tipuaktu, Jaish-e-Mohammad (JeM) firfiak Adil Ahmad Dar-an a motor a khalh  lai hi hmuh theihin a awm a, hemi hmang hian motor neitu pawh hriatchhuah a ni tawh bawk. Mahse pawikhawihna thlen ni aṭang khan motor neitu hi chin hriat lohin a bibo a ni. Motor hi kum riat kaltaa Kashmir-a register a ni a, a neitu phalnain hel pawlin an hmansak ṭhin. 

Bomb phurtu Eeco van hi CRPF convoy escort-tute chuan convoy bul hnaia tlan lo tur hian vawi hnih vawi thum lai an hrilh a, mahse ding leh vei lamah tlankawiin a umzui zel nia sawi a ni. A bomb phurh a tihpuah hma hian minute hnih vel chawl lawkin, hemi hnu hian chak taka tlanin sipai phurtu bus hi va zuin a bomb phurh chu a tipuak zui ta a ni. Jammu aṭangin convoy hi a um tawh nia sawi a ni bawk. 

NIA chuan Pulwama attack a chhuina hi a zo fel hnai tawh niin a sawi a, he pawikhawihnaah hian bomb tipuaktu Adil Ahmad Dar bakah JeM firfiak dang 4/5 vel inhnamhnawih dan finfiahna pawh an nei thei dawn niin an sawi. Pawikhawihna thlenga Pakistan inhnamhawih dan pawh chiang takin a lang a ni, an ti. 

Hetihlai hian Supreme Court chuan Pulwama-a pawikhawihna thleng chungchanga SC court judge hlui kaihhruaina hnuaia a hrana chhui tura ngenna thehluh chu nimin khan a hnawl. Court-ah petition thehluttu hi Vineet Dhanda a ni a, Pulwama pawikhawihna thlenna tura Pakistan firfiakte puitu India mi leh sate chhui chiang a, an inhnamhnawih dante chhui tura judicial commission din a phut a ni. Hei bakah hian Jammu and Kashmir-a India dodalna lam hawi zawnga thilti ṭhin, inlakhran duhtu pawl hruaitute laka action lak a nih dan report kimchang chu sorkar laipui hnenah thehlut tura hriattir turin a ngen bawk. 

Pulwama attack chungchangah hian India chuan Pakistan mi leh sa an inrawlh ngei niin a puh a, mahse hei hi Pakistan lam chuan phain finfiahna awm loa puha a puh thung. He thil thleng avang hian ram pahnihte inkar boruak hi a chhiat zual phah hle. 

Pakistan Prime Minister Imran Khan chuan Pakistan mi inhnamhnawih an awm tih finfiahna India in a pe a nih chuan an chungah a ṭul angin action an la ang tih a sawi a, India-in dik lo taka a bei a nih chuan an chhan let tur thu a sawi. Mahse India chuan Pakistan PM thusawi hi thiam chan an tumna chhuanlam mai niin a puh thung a, Minsitry of External Affairs chuan bomb tipuaktu awmna, JeM firfiak pawl leh an hotu lu ber Masood Azhar-te chu Pakistan-a awm tih hriat chian vek a ni a, Pakistan tan hei hi finfiahna ṭha tak a tling nghal a ni, a ti. Kum 2008-a Mumbai beih a nih ṭum  pawh khan Pakistan hnenah hian an rama firfiakte thiltih a ni tih finfiahna pawh pek vek a ni a, mahse kum 10 chuang hnuah pawh heng mite thubuai ngaihtuahna hian hma a sawn thei lo a ni, a ti.