Surgical Strike 2.0: Mirage-2000 fighter jet hmangin Pakistan firfiak camp bomb
Indian Air Force (IAF) te chuan nimin zing khan Mirage-2000 fighter jet 12 hmangin Pakistan ram chhunga Jaish-e-Mohammad (JeM) firfiak camp an bomb chhiat sak.
Mirage fighter jet hian Line of Control (LoC) kaltlangin firfiakte camp beihnan hian bomb kg 1,000 vel zet an thlak a ni. Camp an bomb-naah hian firfiak 200-300 vel an thi nia sawi a ni bawk.
IAF-te hian Pakistan occupied Kashmir (PoK)-a Muzaffarabad leh Chakoti bakah, Khyber-Pakhthunkhwa province-a Balakot-a JeM camp lian ber leh Alpha-3 control room-te an bomb a ni.
Sorkar laipui chuan nimin tlai khan all party meeting a ko nghal a, he hunah hian External Affairs Minister Sushma Swaraj-i chuan eptu party hruaitute chu IAF-ten JeM camp an beih chungchang hi a hrilh chiang dawn a ni. Meeting hi tlai dar 5-ah External Affairs minister chenna, Jawahar Bhawan-ah neih a ni.
Surgical Strike 2.0 danglamna
Nimina IAF-ten PoK-a surgical strike an neih hian ṭum danga strike a neih ṭhin aia danglama pali-na a nei.
1. Foreign Secretary chuan nimin khan PoK-a Balakot-a Jaish-e-Mohammad (JeM) training camp lian ber beih a nih thu a sawichiang nghal a, hei hi India-in firfiakte bei tura Pakistan ram a luh ril ber ṭum a ni. Tum danga a lo beih tawhte chu ramri, Line of Control (LoC) hrula firfiakte inkhuarna hmunte a ni tlangpui a ni.
2. Tunṭum hi IAF in Pakistan terror training camp bei tura LoC an kaltlangna hmasa ber a ni. LoC an kaltlang hnuhnung ber chu kum 1971-a Indo-Pakistan War lai kha a ni. Kum 1999-a Kargil War lai pawh khan IAF jet-te hian firfiakte hmunhmate bei mah se LoC hi an paltlang lo.
3. Pakistan Army tan an ram chhung ngeia Indian Air Force lut a, firfiak training camp an bei hi thil zahthlak tak a ni. Kar kalta Zirtawpni mai pawh khan Pakistan Army thupuangtu Maj Gen Ghafoor chuan Pakistan armed force-te chu India sipaite chuan eng kawng mahin an ṭhawng thei dawn lo tih sawiin, anmahni zawk chuan India chu an la ṭhawng zawk dawn niin a sawi a ni.
4. India hian Pakistan ram chhungah ngeia indo thlawhtheihna a tirh luh vawi khatna a ni.