Pakistan-in emergency meeting ko

IAF-ten Pakistan ram chhunga JeM firfiak camp an beih hnuah Pakistan Foreign Minister Shah Mahmood Qureshi chuan Islamabad-ah press conference neiin, Prime Minister Imran Khan chuan security chungchang sawiho turin emergency meeting a ko tih a sawi. 

Qureshi chuan India chetdan chu LoC-a inremna thuthlung an siamte palzutna an ni tiin, Pakistan chuan lo bei let leh mahni inveng turin dikna a nei a ni, a ti. India thiltih dan chu a ṭul anga an la chhanlet tur thu a sawi a ni. 

Pakistan sipaie pawhin IAF jet-te hi an ram chhungah an thlawk lut ngei tih sawiin, Pakistan Air Force-ten an lo dan hmain Khyber-Pakhtunkhaw province-a Balakot hi an thleng hman a ni, an ti. Pakistan armed forces thupuangtu, Major General Asif Ghafoor chuan IAF jet-te hi PAF-te hian Balakot bulah an lo dang a, hei vang hian IAF fighter-te hian hmanhmawh takin an bomb phurh chu thlakin an thlawk kir nghal tih a sawi.

Pakistan Prime Minister Imran Khan chuan National Security Council an neih zawhah Pakistan Armed force zawng zawngte chu inpeih turin a hriattir nghal.