IAF pilot chin hriat lohin awm Pakistan-in IAF pilot an kutah a awm niin sawi
Indian Air Force(IAF)-ten Thawhlehni zinga Pakistan ram chhunga Jaish-e-Mohammed (JeM) firfiakte camp lian ber bomb a, firfiak eng emaw zat an thah hnuah nimin khan IAF leh Pakistan Air Force (PAF)-te an inbei zui a, thlawhtheihna inkahthlak sakah an insawi ve ve.
Nimin zing khan Pakistan Major General A Ghafoor chuan Pakistan Air Force (PAF) jet-te chuan Pakistan boruak china thlawk lut, IAF aircraft pathum chu umchhuakin, thlawhtheihna pahnih chu an kahthlak sak niin a sawi a, pilot an man tih a sawi bawk. Pakistan sipai thupuangtu chuan IAF thlawhtheihna pakhat hi ramri bula India ram chinah a tla tih sawiin, pakhat chu an ram chhungah a tla a, pilot pahnih manin pakhat chu hliam a tuar vangin damdawi-inah enkawl tura dah a ni tih a sawi. Pakistan military PR wing chuan IAF pilot an man nia an sawi lanna video hi an tichhuak a, a mit tuamsak a ni. An mi man hian a hmaiah hliam a tuar a, IAF Wing Commander Abhinandan a nih thu leh, a service number 27981 a nih thu a sawi.
Ghafoor chuan Pakistan chuan India nena an inkar buaina tihpunlun zel a duh lo a, indo a duh lo tih sawiin inremna kawng zawng tura Pakistan lam rawtna chu India chuan rilru fim taka a lo ngaihtuah a ngai a ni, a ti. Pakistan Prime Minister Imran Khan pawhin an sipaiten IAF thlawhtheihna an kahthlaksak nia an sawi chu thudik niin a sawi bawk.
Hetih lai hian Foreign Ministry thupuangtu chuan nimin khan Pakistan chuan F-16 fighter jet hmangin India ram china sipai hmunte rawn beih a tum a, mahse hei hi an lo dang thei niin a sawi. PAF fighter jet pakhat chu an kahthlak sak thu sawiin, hemi rual hian an inbeihnaah India lam hian MiG21 Bison fighter jet erawh a chan ve niin a sawi a, a pilot pakhat chu chin hriat lohin a awm tih a sawi.
External Affairs Ministy thupuangtu Raveesh Kumr chuan Pakistan jet an kahthlaksak hi LoC bula Pakistan ram chinah a tla niin a sawi. "MiG21 jet erawh kan chan ve a, pilot hi a awmna chin hriat a ni rih lo. Pakistan chuan pilot hi an man niin an sawi a, mahse hei hi kan la finfiah lo" a ti. MEA chuan nimin tlai dar 5 khan Delhi-a Pakistan Deputy High Commission Syed Haider Shah chu a ko nghal a, Pakistan Air Force-te chetdana a lungawi loh thu a thlen.
Pakistan sipaiten hian IAF-ten Balakot-a JeM camp an beih hnu, Thawhlehni zan khan Akhnoor sector-a LoC-a inkahhai thuthlung siam chu palzutin, India lamah silai an hmetpuak leh a, sipai panga-in hliam an tuar. Hei hi Pakistan sipaiten a zawna ni nga chhung inkahhai puan an palzutna a ni.
Budgam-a thlawhtheihna tlaah mi pali thi :
Nimin vek khan J&K-a Budgam district-ah Mi-17 transport chopper a tla a, thlawhtheihnaa chuang mi pali te chu an vaiin an thi. Aircraft hi chawhma lam dar 10.05 khan Budgam-a Garen Kalaan khuaa leilet zawlah a tla a, a tlak hnu hian nasa takin a kang zui a ni. Defence official-te chuan Mi-17 chopper hi a khawl lam fel loh vanga tla niin an sawi. Budgam-a thlawhtheihna tlak chhan hi Pakistan nena inkaihhnawihna nei a nih loh thu official-te chuan an sawi nghal bawk.