Surgical strike 2.0 : Firfiak beihnan Rs vbch 1.7 man bomb thlak
Indian Air Force (IAF)-ten February 26 zinga Pakistan-a Balakot area-a Jaish-e-Mohammed (JeM) firfiak camp beihna atana laser-guided bomb, kg 1,000 an thlak kha cheng vaibelchhe 1.7 man a ni.
IAF-te hian Mirage-2000 fighter jet hmangin Line of Control (LoC) kaltlangin Pakistan-a JeM camp hi an bomb a ni. Firfiakte camp beihna tana Pakistan ram chhunga IAF indo thlawhtheihna tirh luh leh bomb an phurh hlut zawng hi cheng vaibelchhe 2,568 a ni. Bomb kg 1,000 zet chu Balakot-a JeM camp leh Muzaffarabad leh Chakothi area-a an camp dang beih nan an thlak a ni. Firfiak camp beihnaah hian JeM firfiak 200-300 inkar an thi a, an zingah hian an commander-te pawh eng emaw zat an tel.
JeM camp beia IAF fighter jet-te Pakistan rama an thlawh luh lai hian cheng vaibelchhe 1.750 man, Airborne Warning And Control System (AWACS) surveillance aircraft chu Pakistan thlawhtheihna thlawk an awm leh awm loh veng turin dah a ni bawk. Hei bakah hian he mission thawhna atan hian Ilyushin mid-air refilling tanker, cheng vaibelchhe 22 man leh IAF Heron surveillance drone, cheng vaibelchhe 80 man chu chhawp an ni bawk a ni.
Russia siam Sukhoi Su-30MKI air superiority aircraft pathum, (pakhat cheng vaibelchhe 358) man chu JeM camp beih a nih chhung, minute 21 chhung hian a ṭul huna che chhuak thei turin India ram chinah chhawp an ni a, hei bakah hian MiG29 panga (pakhat cheng vaibelchhe 154) man pawh chhawp tel an ni bawk.
IAF hian firfiakte camp beihna atan hian Mirage-2000 12 an hmang a, pakhat hi cheng vaibelchhe 214 man zel an ni. Gwalior airbase aṭangin GBU-12 conventional laser-guided bomb kg 225 phurin an thlawk chhuak. GBU 12 Paveway II (Guided Bomb Unit) tin hian ralthuam kg 225 ṭheuh, cheng nuai 14-14.7 man an phur a ni. IAF hian firfiakte hmun pathumah hian bomb round 4-5, cheng nuai 56 - cheng nuai 73.5 inkar an hmang a ni.
JeM camp beihnaah suicide bomber 42 thi tel :
IAF-ten JeM camp lian ber, Balakot an bomb-naa firfiak thi zingah trained sucide bomber 42 an thi tel. Intellingence lam chuan heng mi, thihchilh bomb tipuaktu atana training an pek vek tawhte hi India rama rawn luh tuma nghak mekte an ni tih a tarlang.
JeM hotu Masood Azhar chuan Balakot-a an camp chu bomb a nih tih a nemnghet a, hemi rual hian camp beihnaah hian an pawl mi leh sa thi an awm lo niin a sawi thung.