Kerala-ah Nipah Virus vei hmuchhuak
Kerala Ernakulam district-a zirlai kum 23 mi chu Nipah virus kaia rinhlelh a ni a, Pune-a National Institute of Virology (NIV) ah test sample thawn a nih hnuin, NIV hian Nipah Virus a ni ngei a ni tih an finfiah tih Kerala Health Minister KK Shailaja chuan Thawhlehni khan a sawi.
Kochi-a press conference-a thu a sawinaah Minister chuan nimin chawhma lama test result an dawn letnaah Nipah Virus a ni ngei a ni tih finfiahna an dawng tih a sawi a, a darh lohna turin sorkar chuan hma a lak chhunzawm nghal dawn tih a sawi bawk.
Nipah virus vei an hmuhchhuah enkawltu nurse pahnih leh midang pahnihte chuan khawsik sang tak an nei tih sawi a ni bawk a, dinhmun ngaihtuahawm lutuk erawh an ni lo tih sawi mah se pakhat chu isolated ward-ah dah a ngai a ni.
KK Shailaja chuan Nipah Virus kai tih an hmuhchhuah zirlai pawh chu a dinhmun a ngaihtuah awm lo tih sawiin tunah chuan life support pawh hman a ngai lo tih a sawi. Chiai emaw hlauhna tur a awm lo tih sawi bawkin, nikum lamah Nipah Virus darh vanga experience an neih tawhnaah hmalak dan an thiam tawh tih a sawi a, khawsik neite erawh chu enkawl vat an ngaih tur thu a sawi a ni.