Mumbai rel station-ah puak thei thil man Mipui fimkhur turin chah

Nimin khan Mumbai-a Kurla Terminus rel station-ah puak thei thil eng emaw zat man a ni a, mipuite chu fimkhur tura chah an ni. Heng puak thei thilte hi a neitu hriat a ni lo a, police-te'n an chhui zui nghal a ni. 

Puak thei thilte hi West Bengal aṭanga Mumbai pana tlan Shalimar Express-ah man a ni a, lehkha hnutchhiah pakhat hmuh tel a ni bawk. He thil thleng avang hian fimkhur thilah rel station hi khar nghal a ni a, thil duhawm lo thleng erawh hriat tur a la awm lo. 

Helai hmun hi police-te chuan an pan nghal a, thil thlen dan hi an chhui zui a ni. Police-te chuan geletin leh a tihpuahna hmanrua eng emaw zat an man tih an sawi. Lehkha inziak an manah chuan BJP demna thu a inziak bawk a ni. 

Forensic Scientific Lab (FSL) team leh Maharashtra Anti-Terrorism Squad (ATS)-te pawhin rel station hi an thleng nghal a, hnu chhui hna an thawk a ni. 

Heng thil hi Uran, Navi Mumbai-a ISIS-te thuziak hmuh a nih tuka thil thleng a ni a, venhimna lam khauh taka kalpui nghal a ni. He thil thleng hian Mumbai mipui a tiralkhel hle a, hmun hrang hrangah pawikhawihna thleng thei veng turin hma lak nghal a ni. 

Police officer pakhat chuan, "He thil thleng hi kan ngai thutak hle a, mipuite pawh fimkhur turin kan ngen a ni. Puakthei thilte kha wire nen thlunzawm an ni a, vanduaina thleng palh thei reng a ni," tiin a sawi. Shalimar Express hian zing dar 7:30-ah Kurla Terminus hi a thleng a, passenger-te an chhuk hnuah a tifaituten heng puak thei thilte hi an hmu a ni.