IAF aircraft zawn hna tawp san lailawk A alh khu ni awm tak an hmu

June 3, Thawhṭannia chin hriat loha bo Indian Air Force AN-32 transport aircraft zawn hna chu khaw awm danin a zir loh avangin, Nilaini tlai aṭang khan a nawlpui anga zawn chu tihtawp lai lawk a ni. Hetih rual hian Sukhoi-30 MKI leh C-130J special operations aircraft hmangin zan lamah a zawn hna hi ngawrh taka kalpui reng a la ni. 

Mi 13 chuanna IAF AN-32 hi Thawhṭanni khan Assam-a Jorhat aṭangin Arunachal Pradesh panin a thlawk chhuak a, chin hriat lohin a bo zui a ni. A zawn hna hi ngawrh takin kalpui ni mah se tun thlengin hmuh a la ni lo a, ruah sur leh chhum zing avangin zawn hna kalpui chak theih a ni lo. 

Helicopter hmanga zawn hna bik chu Ningani tlai aṭang khan tihtawp lailawk a ni a, khaw awm dan a zirin chhunzawm leh vat tura ruahman a ni. 

Arunachal Pradesh-a thingtlang khaw mite chuan AN-32 aircraft bo ni, Thawhṭanni chawnu lam khan meikhu chhah tak an hmuh thu an sawi. Hemi chungchangah hian AP chief minister Pema Khandu chuan, "Tumbin khaw mi pathumte chuan tlang aṭanga khu chhah tak lo chhuak an hmu a, hei hi Molo khua aṭanga km 7-8 vel a nih thu an sawi," tiin, mita hmutu an awm thu nimin khan a sawi.

Helai hnaia awmte pawhin khu chhah tak hi an hmu tih thawm a awm a, finfiahna erawh a la awm lo. Chief Minister Pema Khandu chuan Siang, West Siang, Lower Siang leh Shi-Yomi district thuneitute chu beng lo chhi tur leh, an theih ang anga hma lo la turin a ngen bawk. 

Indian Army leh Air Force-te chuan AN-32 Aircraft zawn hna hi a bona lai vel nia an rin, Siang District huamchhung sq km 2,500 vel chu ngawrh takin an dap ve mek bawk. Thawhlehni aṭang khan Indian Navy chuan Long Range Maritime aircraft P8i hmangin chung lam aṭangin a zawn hna hi an kalpui ve bawk a, Indian Space Research Oraganisation (ISRO) satellite CARTOSAT leh RISAT hmangin thla lak kual reng a ni bawk. Amaherawhchu, khaw awm danin a zir loh avangin duh angin hna an thawk chak thei lo a ni.