RBI-in repo rate bps 25-in a tihniam NEFT, RTGS transfer-a pawisa chawi titawp

Reserve Bank of India (RBI) chuan nimin khan thuchhuah an siam a, repo rate basis points (bps) 25-in an tihniam tih an tarlang.

Heihi kumin chhunga an tihhniam ṭum thumna a ni tawh a, economic hmasawnna tlahniam tihsan lehna tur leh consumer-te pawisa hman tihpunna tura ti an ni.

RBI monetary policy committee (MPC) chuan repo rate  chu  6% aṭangin 5.75%-ah an tihniam a, hei hi kum kaw chhunga a hniam ber ṭum a ni hial. Repo rate hi apex bank-in commercial bank-te hnena short-term money a   puktir ṭhin rate sawina a ni. Reverse repo rate (commercial bank-te'n apex bank-a pawisa an dah sawina) pawh 5.75% aṭangin 5.50%-ah an tihniam bawk.    

MPC hian an policy an thlak a, interest rate tihtlem kawngah hian hma an la ta nia sawi a ni. RBI governor Shaktikanta Das chuan RBI hian gross domestic product (GDP) ṭhanna tura an beisei chu 7.2% aṭangin 7%-ah tun financial year-ah hian an ennawn tih an sawi. 

RBI hian heti hian kumin chhungin interest rate hi bps 75 laiin an tihniam tawh a, hei hian lending rate a tihhniam beisei a ni a, home leh consumer loan-a equa­ted monthly instalments (EMI) pek ṭhin a tlakhniam beisei a ni.

Digital transaction chawilarna atan RBI chuan National Electronic Funds Transfer (NEFT) emaw Real Time Gross Settlement System (RTGS) emaw hmanga pawisa transfer-a pawisa an cut ṭhin chu an titawp tih an puang.

Central bank chuan an hnuaia awm bank-te chu NEFT leh RTGS transfer-a pawisa cut ṭhin chu titawp turin an ngen nghal bawk. RBI hian ATM-a pawisa lakchhuahnaa pawisa chawi awm ṭhin pawh tihtawp an tum nia sawi a awm a, hemi chungchangah hian anmahni lam hian thuchhuah an la nei lo thung.

RTGS hi pawisa tam tham tak tak transfer nana hman a ni a, NEFT hi chu cheng nuai hnih thleng transfer nana hman a ni ṭhin thung. Tun dinhmunah hian SBI chuan NEFT-ah hian Rs 1-5 an cut a, RTGS-ah hian Rs 5-10 an cut ve bawk a ni. RBI chuan hemi chungchanga inkaihhruaina dan hi kar leh lamah an tichhuak dawn tih an sawi.