Ni khatah hri kai thar 17,000 chuang awm

Union health mi­nistry-in nimina data a tihchhuahah, Nilaini khan ram chhungah hri kai hmuh chhuah thar mi 17,407 an awm leh a, thla khat chuang hnuah  ni khata hri hmuh tam ber ni a thleng leh a ni. 

Nilaini vek khan hripui vanga thi mi 89 awm leh bawkin, ram pumah Covid-19 thihpui hi mi 1,57,435 an awm tling tawh a ni. Hri kai hmuh thar zinga 85.51% hi state paruk - Maharashtra, Kerala, Punjab, Tamil Nadu, Gujarat leh Karna­taka ami an ni a, hri vanga thi zinga 88.76% pawh heng state-a mi hi an ni bawk. 

Ram chhunga hri leng la hluarna ber,  Maha­rashtra state-ah chuan hri kai thar  9,855 an awm leh a, nikum October 17 hnuah state chhunga ni khata hri kai an tam ber ni a ni. An zinga mi 1,121 hi Mumbai khawpui chhunga mi an ni a, state positivity rate hi 13.2% ah a kai chho leh tawh a ni. 

Hri kai hmuh tawh zingah 97.03% enkawl dam an ni tawh a, thihpui hi 1.41% an awm bawk. Health ministry chuan Covid-19 hri vanga thi zinga 70% chuang chu natna benvawn nei niin a tarlang.