Uttarakhand-ah LPG man sang duh lohna lantir

Uttarakhand state budget session neih mek karah, Congress state chief leh Chakrata MLA Pritam Singh hoin party worker-te chuan Assembly House kawtah Liquefied Petroleum Gas (LPG) cylinder man sang zel duh lohna lantirin nimin khan sit-in protest an huaihawt. 

Summar capital, Gairsain-a assembly session neih mekah, eptu party Congress chuan state sorkar chu thil man sang chungchang ngaihven tawk lohah a puh. MLA Pritam Singh chuan, "BJP sorkarin state budget a pharh dawn a, mahse eirawngbawlna gas bakah petrol leh diesel man san chhoh zel chungchang chu a ngaihthah tlat a ni. Thil man sang zel avanga mi retheite tawrhna hi ngaihven turin kan duh a ni. Mahse BJP hruaitute chuan thil man a san belh lo tiin an sawi tlat thung, special package an dawng ang a, thil man sanna hi an hmu ve thei lo a ni ang," a ti.