J&K : Delimitation Commission hun pawhsei sak

Jammu and Kashmir state nihna tihtawp a, union territory pahnih - Jammu and Kashmir leh Ladakh-a ṭhen a nih hnua J&K parliamentary leh assembly constituency duang ṭha tura din, Delimitation Commission chu kum khat dang hun pek belh an ni. 

Kum 2019, October thlaa din Supreme Court judget hlui Rajana Prakash Desai kaihhruai, Delimitation Commission hi an hna zo fel turin kum khat dang hun pek belh a nih thu sorkar thuchhuah chuan a tarlang a, hei vang hian J&K Union Territory-ah assembly inthlan buatsaih a la ni mai thei dawn ta a lo a ni. 

Delimitation Commission hi J&K UT thar bakah, hmarchhak state pali - Assam, Manipur, Arunachal Pradesh leh Nagaland-a electoral constituency siamṭhat tura din an ni. Mahse J&K tan bik chauh an  hnathawh hun hi pawhsei sak an ni thung.

Parliament-in kum 2019, August thlaa Jammu and Kashmir Reorganisation Act a pass hma khan, J&K Assembly-ah hian seat 87 a awm a, heng zinga seat pali chu Ladakh biala mi a ni. Mahse tunah chuan Ladakh hi Union Territory hran a ni tawh thung.