SC-in kum upate ngaih pawimawh turin private hospital-te hriattir

Supreme Court chuan nimin khan private hospital-te  hnenah damdawi-ina admit leh enkawlna pek chungchangah kum upa zawkte chu dah pawimawh hmasa turin a ti. 

Justice Ashok Bhushan leh RS Reddy-te awmna bench chuan nikum August 4-a order an lo tihchhuah tawh, sorkar hospital-te hnenah Covid-19 hripui leng karah kum upa lam, damdawiina inenkawl ngaite chu ngai pawimawh tura hriattirna a lo siam tawh chu siamṭhain, sorkar hospital-te bakah private hospital-te pawh upa zawkte dah pawimawh tur hian a ti ve leh a ni. 

Court-in nikuma thupek a lo tihchhuah tawh chungchangah hian Odisha leh Punjab state tih loh chuan hma an lak dan engmah an tarlang lo nia sawiin senior advocate Ashwani Kumar chuan petition a thehlut a ni. Nimina a petition ngaihtuahnaah, Kumar chuan state sorkarte chuan court thupek tihchhuah kalpuina tur hian Standard Operation Procedures (SOP) thar an siam ve leh a ngai tih a sawi. Hei bakah hian court chuan state tina health leh social welfare department-te pawh hriattirna pek a ṭul maithei tih a sawi bawk. 

Nikuma Supreme Court-in thupek a tihchhuahah hian, kum upate chu an pension mumal taka pek an ni tur a ni tiin, state sorkar chuan Covid-19 leng mek avangin damdawi, mask, sanitiser leh mamawh dangte pawh a pe ṭhin tur a ni, a ti bawk. An taksa te a chak tawk tawh loh avangin hospital-a admit chungchangah pawh dah pawimawh hmasak an ni tur a ni a, taksa lama harsatna an sawite pawh hospital thuneitute chuan rang takin an bawhzui nghal tur a ni, a ti.