PM Modi-a'n Sri Lanka a tlawh

Easter Sunday-a bomb a puah hnua ramdang hruaitu Sri Lanka tlawh hmasa ber ni turin, Prime Minister Narendra Modi chuan nimin zing khan Sri Lanka a thleng. Modi hi Sri Lanka Prime Minister Ranil Wickremesinghe chuan Colombo-a Bandaranaike International Airport-ah a lo hmuak a ni.

Sri Lanka khawpui Colom­bo-a Presidential Secretariat-ah Narendra Modi lawmna hun hi hman a ni. Modi chuan Sri Lanka chu a dingchhuak leh dawn tih sawiin, firfiaka chetna atthlak tak chuan Sri Lanka chu a tichhe thei lo, a ti. India leh Sri Lanka chu an inlungrual hle tih a sawi bawk.

PM Modi hian a Twitter-ah pawh Sri Lanka a thleng leh thei chu lawmawm a tih thu sawiin, kum li chhunga a ṭum thum tlawhna a ni tawh tih a sawi. Sri Lanka-in an lo lawm­na chu lawmawm a tih thu a sawi a, India chuan a ṭhian­te chu ṭanpui an ngaih laiin a thlah­thlam ngai lo, a ti. Modi hian President Mai­thripala Sirisena, Prime Minis­ter Wickremesinghe leh Opposition leader Mahinda Rajapak-te chu meeting a neihpui nghal bawk.

Modi hian Sri Lanka a tlawh hma hian Maldives a tlawh hmasa a, Inrinni khan Maldivian President Ibrahim Mohamed Solih chu inbiakna a neihpui a, ram pahnih inzawmna tihchakna atan inremna paruk an ziak a ni. Sri Lanka-ah hian kumin Easter Sunday khan hmun hrang hrangah bomb a puak a, mi 250 vel zetin nunna an chan a ni.