West Bengal: BJP leh TMC inkara buaina chhuakah mi pali an thi

West Bengal-a North 24 Parganas, Sandeshkhali-ah Inrinni khan Trinamool Congress leh Bharatiya Janata Party worker-te inkarah buaina a chhuak a, mi pali an thi.

Police-te chuan mi pathum an thi tih an report thung a, BJP pahnih leh TMC member pakhat a thi tih an tarlang. Hetih lai hian BJP chuan an member mi pathum an thi tih an sawi thung. State BJP chuan Sandeshkhali-a buaina chhuak chungchang hi Union Home Minister Amit Shah hnenah an thlen nghal bawk.

BJP leh Trinamool-te hi party flag indahbo sak chungchangah an intibuai ṭan nia tarlan a ni. Trinamool leader leh state food minister ni bawk Jyotipriyo Mullick chuan an party worker Qayum Mollah chu Hatgachhi-a party meeting-a a tel tur kah a nih hnuah vihhlum zui a ni tih a sawi. 

BJP Bengal general secretary, Sayantan Basu pawhin BJP worker pathum kahhlum an ni tih a sawi ve bawk. Inrinni nileng khan state chhung hmun hrang hrangah buaina chhuak report a awm deuh reng nia tarlan a ni bawk.

Union Home Ministry chuan Inrinni zan khan state sorkar chu buaina chhuah dan report kimchang pe turin a ti a, he thu ziah lai thleng hi chuan Chief Minister Mamata Banerjee chuan engmah a la sawi lo thung.