India-in Pakistan hnenah ngenna thlen
India chuan June 13-14 chhunga Kyrgyzstan-a neih tur Shanghai Cooperation Organisation (SCO) meeting-ah, Prime Minister Narendra Modi a tel ve theih nan, an ram chhunga thlawhtheihna thlawh phalsak turin Pakistan a ngen.
Pakistan hian India-in Balakot-a air strike a neih avang khan a ram chinah India thlawhtheihna thlawh luh a remti lo a, India aṭanga Pakistan panna route 11 zinga pahnih chauh chu a hawn sak a ni. Hei vang hian harsatna nasa tak a thleng mek a, Modi-a zin tur pawhin harsatna a tawh pha dawn tih a lang.
SCO meeting hi Kyrgyzstan khawpui Bishkek-ah neih a ni dawn a, helai hmun hi Pakistan paltlang chuan darkar li chhungin a thlen theih a, hel a ngaih erawh chuan darkar riat vel tal a ngai dawn thung. Hei vang hian India chuan Pakistan hnenah ngenna a thlen a, chhanna erawh a la dawng lo.
India hian May thla tir lam khan Pakistan Foreign Minister Shah Mehmood Qureshi chu India airspace paltlanga Maldives leh Sri Lanka tlawh a lo phalsak tawh a, Pakistan pawhin May thla vek khan External Affairs Minister Sushma Swaraj chu SCO meeting-a a tel dawn vangin phalna a lo pe ve tawh bawk.
SCO meeting neih turah hian PM Modi leh China President Xi Jinping-te chu an inhmu dawn a ni.