Congress-in thil man sang duh lohna online campaign nei
Congress party chuan thil man sang duh lohna lantira ''Speak Up Against Price Rise'' online campaign a buatsaih chu nimin aṭang khan a nei ṭan.
Party president hlui, Rahul Gandhi chuan online campaign hi hawngin, sorkar laipui chu chhiah a duh vang ringawtin mipuite tana phurrit a nih tur pawh ngaihtuah loa thil man tisangah a puh. Congress chuan an official twitter aṭangin ram mipuite chu thil man sang duh lohna lantira online campaign an neih chu zawm turin an sawm. BJP chu mipuite phurrit hlentu party, 'Burden the Janta, Party' a ni tia sawiin, mipui an rawk dante hi sawichhuah a, aupui chuan ram a siamṭha thei dawn a ni tiin, an movement chu zawm turin an sawm a ni.
Rahul Gandhi chuan a twitter-ah hastag "SpeakUpAgainstPriceRice' hmangin, ram tihchhiat a nih mek chungchanga aw chhuah tura mipuite a sawm a, nitin mamawh thil hrang hrang man a san chhoh dan video pawh a tag bawk.
Congress hruaitu hlun Shashi Tharoor pawhin thil man sang zel duh lohna lantir video post bawkin, prime minister Narendra Modi chuan a sum bawm tihkhatna turin mipui nawlpuite ipte a bunruak sak a ni, a ti. Hetiang hi India chuan a enliam mai mai dawn lo a, duh lohna thu hi a auchhuahpui zel dawn a ni tiin a sawi.
Party hruaitu dang, Sachin Pilot leh Priyaka Gandhi Vadra-te pawhin an twitter-ah #speakupagainstpricerise campaign hi kalpui ve nghalin, Pyrianka Gandhi Vadra chuan mipui nawlpuiin harsatna an tawh dante dah bo a, mahni insawithiamna tura chhuanlam hrang hrang neiah a puh.
Priyanka chuan, "BJP sokarin thil man sang zel chungchangah chhuanlam hrang hrang a hmang a, thlasik vangin thil man a sang te tiin, sorkar hmasa te a puh a, mipuite zin veivak tlem vang ti tein a sawi a ni. Keini hian petrol, diesel leh thil dang man sang zel thunun theihna kan nei lo. Mipuite harsatna hi an hre duh lo a ni," a ti.
Tun hnaiah petrol, diesel, LPG cylinder leh nitin mamawh thil man a sang nasa hle a, state ṭhenkhatah chuan petrol litre khat man hi Rs 100 te a kai a ni. Congress party bakah epty party hrang hrangte chuan thil man sang duh lohna hi an lo lantir fo tawh a ni.