Vaccine certificate-a Modi thlalak dah chungchang EC-in Health Ministry hnenah zawt fiah
Election Commission chuan Covid-19 vaccination certificate-a prime minister Narendra Modi thlalak dah tel a nih chungchang chu health ministry hnenah sawifiah turin a ti.
Assembly inthlan neihna tur, West Bengal-a rorellai Trinamool Congress (TMC) chuan PM Modi thlalak dah hi model code of conduct (MCC) palzutna a ni tiin complaint a thehlut a ni. EC official chuan thil awmdan dik tak hriatfiah hmasak a ṭul tih sawiin, heng certificate hi health ministry thupek anga sem chhuah a ni em tih hriat a ngai a ni, tiin, he thila inhnamhnawih hrang hrangte aṭanga sawifiahna an ngaihchan tur thu a sawi. West Bengal chief electoral officer pawh report pe tura hriattir a ni bawk a, TMC complaint thehluh hi a dik reng em tih fiah turin an ti a, CEO report behchhanin poll panel chuan action a lak tur thu an tarlang bawk.
February 26-a Election Commission-in Assam, West Bengal, Tamil Nadu, Kerala leh Puducherry-a assembly inthlan neih hun tur a puan aṭang khan heng state/UT-ah hian MCC hi hman ṭan nghal an ni. Nilaini khan EC chuan inthlan neihna tur state/UT-ah petrol pump hrang hrangah PM thlalak chuanna hoarding leh advertisement tarte chu darkar 72 chhunga la thla vek turin thupek a lo tichhuak tawh bawk.