India-in ram 47 hnenah Covid-19 vaccine thawn chhuak

India rama Covid-19 vaccine siam chu Ningani thleng khan ram dang 47-ah thawn chhuah a ni tawh. 

Covid-19 vaccine thawn chhuah hi dose vaibelchhe 4.64 niin, heng zinga dose maktaduai 71.25 hi a thlawna pek niin, dose vaibelchhe 3.93 erawh hralh a ni thung. India vaccine siam dawngtu ram zingah hian a ram ṭhenawmte bakah developed ramte pawh an tel. CARICOM (Carribean country) te pawhin vaccine hi an dawng a ni. Caribbean ramte hian India ram hnena lawmthu sawina resolution pawh an siam nghe nghe a ni. 

Hetih lai hian India ram chhungah pawh Covid vaccine pek chhuah hna hi ngawrh taka kalpui chhunzawm zel a ni a,  mi vaibelchhe 1.8 hnenah vacine hi pek a ni tawh tih union health ministry chuan a sawi. Nimin thlenga ram chhunga vaccine pek tawh zingah hian healthcare worker, dose khatna dawng tawh mi 68,53,083 awmin, dose hnihna dawng tawh 31,41,371 an awm. Frontline worker 60,90,931 hnenah dose khatna leh, 67,297 hnenah dose hnihna pek a ni tawh bawk. Kum 60 chunglam mi 16,16,920 in vaccine hi an la tawh bawk a, kum 45 chunglam natna benvawn nei mi 2,35,901 ten vaccine dose khatna hi an la tawh bawk a ni.