Vawiin aṭangin Budget Session thawh hnihna ṭan dawn

Parliament Budget session thawh hnihna chu vawiin aṭangin neih ṭan a ni leh dawn a, April 8 thleng neih a ni ang. 

Session hi Covid-19 hri laka invenna tura kaihhruaina siamte zawm chunga neih a ni leh dawn a, Rajya Sabha rorel inkhawm chu zing dar 9 aṭanga  chawhnu dar 2 thleng neih niin, Lok Sabha chu tlai dar 4 aṭanga zan dar 10 thleng neih a ni thung ang. 

Budget session thawh khatna hi January 29 khan neih ṭan niin, February 29-ah an zo a ni. February 1 khan union finance minister Nirmala Sitharaman chuan union budget 2021-22 a pharh. Lok Sabha speaker Om Birla chuan session thawh khatnaah hian Lok Sabha-ah chuan rorel inkhawm neih hun tura bithliah a, darkar 50 aṭangin darkar 49 leh minute 17 an hmang thei tih a sawi. President thusawi chungchanga Motion of Thanks neihnaah MP zinga hmeichhia 49-ten thu an sawi tih a sawi tih a tarlang bawk. 

Parliament complex-ah hian MP-te vaccine lakna tur centre chu March 9 aṭangin siam a ni ang. He hmunah hian National Expert Group on Vaccine Administration for COVID-19 (NEGAVAC) kaihhruaina siam angin, MP zinga kum 60 chunglamte chuan Covid vaccine an la thei dawn a ni. 

Session thawh hnihnaa bill ngaihtuah tura sorkar laipuiin a chhawp zingah Pension Fund Regulatory and Development Authority (Amendment) Bill, National Bank for Financing Infrastructure and Development Bill, Electricity (Amendment) Bill, Crypto currency and Regulation of Official Digital Currency Bill te an tel.