Farm law siamṭha turin sorkar a inpeih : Agriculture Minister

Union agriculture minister Narendra Singh Tomar chuan ram chhunga loneituten an dodal mek, farm law chu siamṭha turin sorkar laipui a inpeih reng a ni, a ti. Hemi rual hian eptu party hruaitute chu farm law chungchang chu politicise-ah a puh a, he dan nihna dik tak , a ṭhatna laite chu an hre thiam duh lo a ni, a ti. 

Kar liam ta Inrinni zana thu a sawiah, union minister chuan prime minister Narendra Modi leh a kaihhruai sorkarin loneitute hmakhua a ngai takzet a ni tih sawiin, farm law siamṭha turin an inpeih reng tih a sawi. Hemi rual hian heng dan siam tharte hi a ṭha lo a ni tih tumahin an sawi tur a ni lo a, chhanna pe thei dinhmunah tumah an awm lo a ni, tiin a sawi bawk. 

Ram chhung hmun hrang hrang aṭanga loneitu kalkhawmten nikum November thla aṭang khan Delhi border-ah farm law duh lohna lantirin nawrh an la huaihawt chhunzawm reng a ni. Minister Tomar hian nawrh huaihawt a nih hnuah loneitute hi he dan thar chungchangah hian inremna siampui tumin ṭum eng emaw zat inbiakna a neihpui tawh a, mahse tun thlengin inremna an la siam thei lo. 

Tomar chuan, "Inbiakna  kan neihah pawh dan siamṭhat a nih theih dante pawh ka sawi a, mahse siamṭhat chungchang ka sawi avangin heng dangte hi a ṭha tawk lo tihna erawh a ni lo. Mahse loneituten nawrh an huaihawt reng vangin he rawtna hi siam mai ka ni," a ti.

Eptu party-te chu farm law chungchanga politics huangah hnuk lutah puhin, "Parliament-ah pawh sorkar lam thlir dan pawh ka sawilang tawh. Parliament in hnihah eptu hruaitute ngaihdan pawh hun rei tak kan ngaithla bawk. President-in thu a sawi hnuah pawh, eptute chuan loneitute nawrh chungchang ringawt an buaipui a, farm law lam hi an sawilang lo," tiin Tomar chuan a sawi. 

Agriculture minister chuan, "Inthlak danglamna hi a taka kalpui pawh a harsa hle ṭhin. Mi ṭhenkhatin nuihza siam nan an hmang a, ṭhenkhatin nasa takin an lo dodal bawk ṭhin. Mahse a policy chu a ṭhat tlat chuan mipuite pawhin an pawm chho ve zel a ni," a ti. 

Hetih lai hian farm law duh lohna lantirtu, loneitute tha tichak turin loneitu pawl, Bhatiya Kisan Union (BKU) hruaitu Rakesh Tikait chuan vawiin hian Madhya Pradesh a tlawh dawn. 

Tikait hian vawiina Rewa, Sheopur leh Dewas-an loneituten Kisan Mahapanachayat an neih tur chu a hmanpui dawn a ni. BKU state unit leh loneitu pawl dangte chuan farm law duh lohna lantira kawng zawh an tum. Rakesh Tikait chuan sorkar laipuiin farm law thar pathumte hi a sut leh vek hma chuan nawrh an chhunzawm zel dawn tih a sawi.