IAF AN-32 aircraft hmuh a ni ta Lak chhuah tumin beihpui thlak nghal

Mi 13 chuanna Indian Air Force (IAF) AN-32 aircraft chu chin hriat loha ni 10 dawn a bo hnuah, Thawhlehni khan Arunachal-a Siang District-ah hmuh a ni ta. 

Thlawhtheihna tla an hmuhna hi Lipo khua aṭanga km 16 vel a ni a, nimin zing aṭang khan lak chhuah tumin beihpui thlak nghal a ni. IAF chuan AN-32 hi Mi-17 helicopter hmangin hmuh a nih thu an sawi a, a tlakna hmun hi tlawhpawh tumin hmalak nghal a nih thu an sawi. A tlakna hmun hi ramngaw chhah tak a ni a, heti chung hian a bul vel chu a kang nasa hle a ni. 

Khaw awm danin a zir loh avangin chhanchhuah hna hi thawh chak theih a ni lo a, a hmun tlawhpawh tur pawh hian nasa taka beih a ngai dawn tih an sawi. Advanced Light Helicopters (ALH) leh Mi17 Helicopter hmangin a hmun hi tlawhpawh tum a ni a, mihring dam an la awm leh awm loh finfiah thuai tum a ni. 

A tlakna hmun vel hi Cheetah helicopter leh ALH chopper hmangin tlawh pawh a ni tawh a, amaherawhchu, a hmun a san avang leh ramngaw a chhah avangin an ṭum thei lo. He lai hmun hi feet 12,000 vel zeta sang a nih avangin duh angin hma an la chak thei lo a ni. 

An-32 aircraft-a chuangte hi an thih leh dam hriat a la ni lo a, a finfiah turin IAF chuan special commando 'Garud' an tir a ni. Chhanchhuah hna thawk tur hian tlang lawn mi pakua tirh tel an ni bawk a, an zingah hian civil mi pawh pahnih an tel a ni. A tlakna hmunah hian mi 10 bawr vel chu an thleng tawh nia tarlan a ni a, he thu buatsaih lai hian chanchin kim chang erawh hriat tur a la awm lo thung. 

An-32 aircraft hi June 3 khan Assam aṭangin chawhnu dar 12:25-ah Mechuka Advanced Landing, Arunachal Pradesh panin a thawk chhuak a, minute 30 vel hnuah biak pawh theih lohin a bo zui a ni. He aircraft-ah hian crew pariat leh midang panga, an vaiin mi 13 an chuang a ni. 

IAF chuan An-32 awmna chin hrilh theih hnenah Rs. 5 pek an lo tiam tawh a, information pe an awm hmain an hmu ta a ni.