Nirav Modi bail dilna hnawl

London Court chuan Nirav Modi bail dilna chu nimin khan a hnawlsak a, tun hi bail a din hnawlsak a nih ṭum lina a ni. Bail a dilna hi England and Wales High Court chuan a hnawlsak.

Nirav Modi lawyer, Claire Montgomery chuan Thawhlehni khan bail a nih theihna tur hian dilna a thehlut leh a, mahse India lam aiawh Crown Prosecution Service (CPS) chuan a lo hnial thung. Modi hi West London-a Wandsworth jail-ah dah a ni a, a tanna jail hi a hrehawm hle tih a sawi. Westminster Magistrates Court chuan June 27-ah hearing neih leh turin hun a ruat nghal a, hemi hnu hian July 29-ah neih leh a ni bawk ang.

Nirav Modi hi Punjab National Bank (PNB) sum cheng vaibelchhe 13,000 tihchingpeng chungchangah March thla khan London-ah man a ni a, court-ah hruai nghal a ni. Tunhnai khan court chuan Nirav Modi hi June 27 thleng hreng turin thupek a tichhuak a, hei vang hian bail hi a dil a ni. Mahse court chuan a dilna hi a hnawksak ta a ni. 

Nikum January thlaa PNB sum tihchingpen chungchang sawichhuah a nih hnu kha Nirav Modi hi ram pawn lamah a tlanchhe nghal a, England-ah a awm tih hriat a nih hnuin Enforcement Directorate chuan UK thuneitute hnenah a thubuaite hmachhawn tura India rama thawn turin a ngen a ni. UK court chuan Modi manna tur thupek hi tichhuakin, thupek tihchhuah a nih aṭanga ni thumnaah an man a ni a, hren zui a ni bawk. India rama thawn kir tur chuan dan anga thil tihfel ngai a tam dawn a, hun a la duh rei dawn tih an sawi.