AN-32 aircraft chesualah damchhuak awm lo: IAF

Indian Air Force chuan nimin zing khan thuchhuah siamin, AN-32 aircraft chesualah tumah damchhuak an awm lo tih an tarlang.

IAF, Indian Army leh civil tlang lawn mi 15-te chuan Nilaini khan IAF AN-32 aircraft tlakna hmun Siang District, Arunachal Pradesh an thleng a, thlawh­theihna tlakna lai tak hi kalpawh harsa tak ni mah se a hmun an zuk thlen hnuah chhanchhuah hna thawktute chuan damchhuak an awm loh thu hi an sawi ta a ni. Tlang lawn mi 15 zinga pariat chuan a tlakna lai tak hi an thleng a, an enfiah hnuah chanchin hi thuneitute hnenah an hriattir vat a ni.   

IAF chuan AN-32-a chuang mi 13 zingah damchhuak an awm loh thu chu hreh tak chunga an puan a ngai tih sawiin, nunna chante zahna an hlan nghal thu an tarlang bawk. Mi 13 te ruang hi an vaiin hmuh an ni tawh a, chooper hmanga lak chhuah an ni ang. AN-32 aircraft black box pawh hmuh a ni tawh bawk. 

Air Force chuan thlawhtheihna tlaa thite hming hi an tarlang nghal a: Wing Commander GM Charles, Squadron Leader H Vinod, Flight Lieutenant - R Thapa, Ashish Tanwar, S Mohanty leh Mohit K Garg, Warrant Officer KK Mishra, Sergeant Anoop Kumar, Corporal Sherin, Leading Air Craftsman - SK Singh leh Pankaj-te bakah, Putali leh Rajesh Kumar-te an nih thu an tarlang. 

AN-32 hi metre 24-a sei a ni a, a thla  thui zawng erawh metre 29 lai a ni thung. 

Assam Jorhat aṭangin kar liam ta Thawhṭanni khan a thlawk chhuak a, Arunachal Pradesh-a Mechuka a pan a ni. Mechuka hi West Siang district-a awm a ni a, Line of Actual Control aṭanga km 15 vel leka hlaa awm a ni a, a thlawhchhuah aṭanga minute 30 hnu velah biak pawh theih lohin a awm zui. 

He aircraft hi emergency locator tran­smitter hmanga thuam a ni a, bungraw phurhnaah emergency beacon dah a ni bawk a, hemi hmang hian a awmna chin a chhui theih a ni. Mahse biak pawh theih loha a awm hnu hian signal hi a pechhuak tawh lo a, hei hian mak tih a hlawh hle. 

Indian Air Force, Indian Army-te leh tualchhung mite chuan AN-32 hi ni riat lai an zawng a, satellite, Navy special surveillance aircraft, aerial vehicle leh spy agency hmanrua Global 5000 surveillance jet-te hmangin zawng mah se awlsam takin an hmu mai lo. Chhun zan zawmin an zawng a, mihring leh hmanraw chitin reng hmangin zawng mah se ni riat lai an zawng. A awmna chin hrilh thei hnenah cheng nuai nga lai pek an tiam bawk a nih kha. 

Khua a chhiat avang leh ruah a sur avangin a zawn hna hi thawh chak theih a ni lo. Lipo aṭanga km 16-a hlaah thlawhtheihna tla hi Thawhlehni khan hmuh a ni ta chauh a, a tlakna hmun hi feet 12,000 laia sang a ni a, hemi avang hian chhanchhuah hna thawh pawh hi a awlai lo hle.