PM Modi-a'n SCO summit-ah Firfiak sponsor-tu ramte demna thu a sawi

Prime minister Narendra Modi chuan Zirtawpni khan Shanghai Cooperation Organisation (SCO) summit, Kyrgyzstan khawpui Bishkek-a neihah thu sawiin; firfiak sponsor-tu ramte chuan firfiakte pawikhawihnaah mawh an phur tur a ni tih a sawi. 

Narendra Modi chuan SCO-in firfiakte dona kawnga hmalak a tumna leh a theihnate a sawi a, India chuan firfiak awm lohna society a duh tih a sawi bawk. Prime Minister Modi hian Pathianni liam taa Sri Lanka a tlawh ṭum khan pawisawi lo nunna tam tak firfiakten an lakna hmun - St Anthony’s church a tlawh tih a sawi. Firfiakte bei let turin an inpumkhat a ngai tih a sawi a ni.

He hunah hian Pakistan prime minister Imran Khan pawh a tel ve a, Modi-a thusawi hi Imran Khan beihnaa ngaih theih tak a ni. PM Modi chuan SCO member ramte chu CO Regional Anti-Terrorist Structure (RATS) hnuaia firfiakte beihna kawnga thawkho turin a sawm bawk.

Modi chuan literature leh culture chuan society-ah thil ṭha tak a thlen tih sawi bawkin, a bik takin ṭhalaiteah ram rorelna kalh zawnga chetna a titawp nasa hle tih a sawi. PM hian Bishkek hi Ningani khan a thleng a, Bishkek a pan theihna atan hian India chuan Pakistan chu an ram paltlang phalsak turin a dil a, Pakistan pawh hian a phalsak a ni. Mahse Modi hian Pakistan hi a paltlang leh duh lo a ni.

Kumin kum tira Pakistan-a inkulh Jaish-e-Muhammed (JeM) firfiak ten thihchilh bomb hmanga Jammu & Kashmir, Pulwama district-a CRPF 40 an thah hnu khan India leh Pakistan inkar boruak hi a chhe hle a, Indian Air Force (IAF)-te'n Pakistan-a Balakot an beih hnu aṭang phei kha chuan ram pahnih inkar boruak hi a chhe zual hle.