Hmun hrang hranga doctor-te'n nawrh huaihawt

West Bengal-a junior doctor-te chuan nimin khan a ni lina atan nawrh an chhunzawm leh a, ram chhung hmun hrang hranga doctor-te'n tlawpna an lantir bawk. 

Thawhṭanni zanah khan dam lo pakhat a thih avangin mitthi chhungte chuan Nilratan Sarkar Medical College and Hospital-a doctor pahnih an sawisa a, hemi duh lo hian West Bengal doctor-te hian Thawhlehni aṭang khan nawrh an huaihawt a ni.

Chief minister Mamata Banerjee pawhin nawrh hi titawpa an hna chhunzawm leh turin ti mah se nawrh hi an la chhunzawm tho a ni. Doctor-te hian sorkar damdawi-inah venhimna ṭha tak pek an nih hma chuan nawrh hi chhunzawm zel an tum tih an sawi.

State sorkar damdawi-ina thawk doctor 100 dawm chuan thuneitute hnenah lehkha thawnin, an hna aṭanga ban an duh thu an sawi. Nimin thleng khan doctor 92 (professors, associate professor, assistant professor leh medical officer) chuan ban an hreh loh thu thu­nei­tute hnenah an thlen tawh.

India Medical Association chuan West Bengal doctor-te an thlawpna lantir nan hian nimin khan rampumah nawrh an huaihawt. Delhi Ganga Ram Hospital-a OPD zawng zawng chu nimin khan khar a ni a, AIIMS doctor-te pawhin duh lohna lantir nan hian helmet an khum bawk.

Bengaluru, Telangana, Lu­dhiana, Kerala, Jaipur, Nagpur, Maharsahtra leh hmun hrang hranga doctor-te chuan kawng hrang hrangin duh lohna an lantir ve bawk a ni.