Vawiin aṭangin Parliament budget session ṭan dawn PM-in all party meeting a ko

17th Lok Sabha hnuaia Parliament session hmasa ber tur chu vawiin aṭang hian neih ṭan a ni dawn a, July 26 thleng a awh ang. 

Budget session ṭan hma, nimin khan Prime Minister Narendra Modi-a chuan all-party meeting a ko. Session tluang taka hman a nih theihna turin a hma ni a all-party meeting koh hi tihdan ṭhana neih a ni. Nimina meeting-ah hian Defence Minister Rajnath Singh, SP leader Ram Gopal Yadav, Minister of Parliamentary Affairs Prahlad Joshi leh Rajya Sabha-a BJP leader Thawar Chand Ghelot-te an tel. Party dang hruaitu zingah YRCP hruaitu V Vijayasai Reddy, TMC hotu Derek O'Brien, National Conference hruaitu Farooq Abdullah, NCP hotu Supriya Sule, Apna Dal hruaitu Anu­priya Patel, AAP hotu Sanjay Singh leh TDP hruaitu Jayadev Galla-te an tel bawk. 

Nimin tlai vek khan rorel­lai, National Democratic Alliance (NDA) hruaitute chuan session neih tura thil ngaih­tuah tur hrang hrangte sawihoin meeting an nei bawk a ni. Tun ṭum session-ah hian rorel ṭhutkhawm ṭum 30 neih a ni ang. A ni hmasa ni hnih chu MP thlan tharte rinawmna thu tiamtir lakluh hun atan hman a ni ang a, June 19 hian Lok Sabha speaker thlan a ni ang. June 20-ah President chuan Parliament Central Hall-ah Parliament in hnih ṭhukhawm hmaah thu a sawi dawn a ni. 

Union Finance Minister Nirmala Sitharaman chuan July 5 hian Lok Sabha-ah kum 2019-20 full budget a pharh dawn a, hei hi PM Modi-a kaihhruai NDA sorkar ṭum hnihnaah full budget hmasa ber tur a ni. Budget pharh hma ni, July 4 hian economic survey chu pharh a ni ang. June 20-ah Rajya Sabha inkhawm neih a ni dawn bawk a, July 26 thleng a awh dawn a ni. 

Rorellai, BJP kaihhruai NDA hian Lok Sabha-a seat 545 awmah seat 353 a nei a, mahse upper house Rajya Sabha-a seat 254 awmnaah member 102 chauh neiin majority a la nei pha rih lo. Hei vang hian tun ṭum session-a bill pawimawh pharh tur ṭhenkhat chu pass theih loha dan leh an nih rin a ni. 

17th Lok Sabha-ah hian Congress party chuan an hruaitu tur an la tifel lo. 16th Lok Sabha-a Congress hruaitu Mallikarjun Kharge chu inthlanah khan a chak zo lo a, hei vang hian amah thlaktu tur hi tun thlengin ruat a la ni lo. Party president Rahul Gandhi chuan lower House-a party hruaitu charge hi a la hrih dawn nia sawi a ni a, hetihlai hian Gandhi chuan inthlanpuia an chet ṭhat tawk loh vangin party president dinhmun hi chelh chhunzawm a duh tawh lo a, mahse hruaitu dangten an remti lo a ni.