PM Modi kaihhruainain Ram temple kan din dawn : Shiv Sena MP

Rajya Sabha MP leh Shiv Sena hruaitu Sanjay Raut chuan Prime Minister Narendra Modi leh Uttar Pradesh chief minister Yogi Adityanath te kaihhruaina hnuaiah Ayodhya-ah Ram temple sak a ni dawn tih a sawi. Ram temple sak a nih theih nan inthlanpui neih zawh takah pawh BJP chuan chiang takin hnehna a chang a ni, a ti. 

Nimin khan Shiv Sena chief Uddhav Thackeray leh an party MP-te chuan Lord Ram pianna hmun, Ayodhya tlawh turin Mumbai aṭangin Uttar Pradesh an pan a ni. Uddhav-a nupui, Rashmi leh a fapa Aditya-te pawh an tel. Raut chuan an party tan chuan Ayodhya leh Ram temple chu politics thil a ni lo a, sakhaw thil zawk a ni tih sawiin, temple hming hian vote pawh an zawng ve ngai lo tih a sawi. Thackeray chuan a hma daihin MP inthlan zawhah party MP-te nena Ayodhya tlawh hi a lo tiam tawh a, a thutiam a tihlawhtling mai tih a sawi. 

Thackeray hian nikum November thla khan Ayodhya hi a lo tlawh tawh a, sorkar laipui hnenah Ram temple sak hun tur pawh puang turin a lo nawr tawh bawk. Uttar Pradesh deputy chief minister Keshav Maurya pawhin Ram temple hi sak a ni ngei dawn tih a sawi ve bawk. Ayodhya ram inchuh buaina hi Supreme Court-ah tihkhawtlai mek a ni a, Supreme Court emaw, a  buaipuitu tura ruat mediation panel-in a chingfel thei lo a nih chuan, sorkar chuan Ayodhya-a Ram temple sak a nih theihna tur dan hi a duang mai dawn a ni, a ti.