PM Modi leh MP tharten rinawmna thu tiam

17th Lok Sabha-a Parliament session hmasa ber chu  nimin khan neih ṭan a ni. Session ṭan ni hian Prime Minister Narendra Modi-a leh Member of Parliament (MP) thlan thar ṭhenkhatte chu Lok Sabha member atan rinawmna thu tiamtir an ni. MP thar lakluh hi vawiin hian chhunzawm a ni ang. 

PM leh MP tharte hi Protem Speaker Virendra Kumar-an rinawmna thu a tiam tir a, PM dawtah Defence Minister Rajnath Singh leh Home Minister Amit Shah-te chu thu tiam tir an ni. Lok Sabha Speaker hi naktuk hian thlan a ni ang. June 20-ah President Ram Nath Kovind chuan Parliament joint sitting hmaah thu a sawi dawn a, hemi tlai hian House pahnih member-te chuan zanriah an kilho nghal ang. 

Session ṭan hmain PM Modi-a chuan budget session chu ṭha leh tluang taka an neih theih a beisei thu a sawi. Eptu party-te pawh an member neih zat lamah buai loin, eptu pawl ṭangkai tak ni tura a duh thu a sawi. Democracy ṭha siam tur chuan eptute ngaihdan chu thil pawimawh tak a ni, a ti.

17th Lok Sabha-ah hian a hma ang bawkin eptu party zingah party mala seat 55 hmu pha an awm loh vangin Leader of Oppostion (LoP) an awm leh thei dawn lo a ni.  Eptu party zinga seat la hnem ber, Congress chuan seat 52 a nei a, Lok Sabha-a an party leader tur pawh an la tifel lo. 

Session ṭan hma, Pathianni khan Prime Minister Narendra Modi-a chuan all-party meeting a ko a, meeting hlawhtling takin an nei thei tih a sawi. PM hian naktuk hian Parliament in hnih aiawh nei party hrang hrang president-te chu meeting a neihpui leh dawn bawk. He meeting-ah hian 'one nation, one election' chungchang te, kum 2022-a India independence kum 75-na leh kumina Mahatma Gandhi piancham vawi 150-na lawm dan chungchangte an sawiho dawn a ni.