Bengal CM-in doctor nuarte meeting neihpuiah sawm

West Bengal chief minister Mamata Banerjee chuan nawrh huaihawt mek, junior doctor-te chu an nawrh titawp turin a ngen a, hemi rual hian nimin tlai khan inbiakna neihpui turin a sawm. 

Doctor nuar mekte hnena Bengal sorkarin lehkha a thawnah, nimin tlai khan state secretariat-ah inbiakna nei tur leh, he hunah hian medical college 14-te chu an aiawh mi pahnih ṭheuh tir turin a ti a ni. Meeting-ah hian media lam an tel tur thu a sawi lo a, hei hi doctor-te chuan duh loin, media mite tel chauhin sorkar chu an be dawn tih an sawi. 

Nawrh huaihawt mek doctor-te hian a hmain state sorkar hnenah hian an thil phut, point paruk an tarlanna chu an lo thehlut tawh a ni. An thil phut zingah hian doctor-te venhimnna ṭha zawk pek, junior doctor kut thlaktute chunga hremna lekkawh leh Mamata Banerjee kaihhruai sorkar ngaihdam dil turin an tihnate a tel.

West Bengal doctor-te hian Kol­kata-a NRS Hospital-a junior doctor pahnih chu damdawi-in a damlo thi chhungten kut an thlak avangin June 11 aṭang khan lungawi lohna lantirin nawrh hi an huaihawt a ni. 

Doctor-te nawrh vang hian state chhunga medi­cal service-in a tawrh phah hle. Bengal doctor nuarte hi state danga doctor-te pawhin an thlawpna an lantir chhunzawm zel. Delhi, Rajasthan, Assam, Gujarat, Tripura, Madhya Pradesh, Uttar Pradesh, Odisha, Kar­nataka leh Kerala-a doctor-te pawhin nawrh hi an zawm a ni. 

Nimin khan New Delhi-a All India Institute of Medical Sciences (AIIMS) resident doctor-te pawhin nawrh hi zawmin, chhun dar 12 aṭangin tukin zing dar 6 thleng service an titawp a, mahse hei hian Intensive Care Unit, labour room leh emergency service-te a huam tel lo thung. 

Hmarchhak state hrang hrang doctor-te pawhin nawrh hi an chhun­zawm ve a ni.