TMC-in Parliament budget session tihtawp phut Eptuten fuel man sang duh lohna an lantir

Parliament budget session thawh hnihna chu nimin aṭang khan neih ṭan a ni a, hetih lai hian Trinamool Congress chuan state/UT pangaah assembly inthlan neih a nih dawn avangin Parliament session hi tihtawp an phut. 

TMC hruaitu leh Rajya Sabha member, Derek O'Brien chuan Rajya Sabha chairman  M Venkaiah Naidu hnenah lehkha thawnin, state pangaah assembly inthlan neih hun tur puan a nih tawh avangin session hi tawp turin a ngen.

Inthlan neih tur zingah hian TMC sorkarna, West Bengal pawh a tel tih sawiin, an party MP-te pawh inthlan atana campaign a ngaih avangin Parliament session hi an tel thei dawn lo a ni, a ti. Party MP Sudeep Band­yopadhyay pawhin Lok Sabha Speaker hnenah  hetiang bawk hian lehkha thawnin, inthlan dawn vanga Parliament session titawp turin a ngen ve bawk. 

March-April hian state/UT pangaah assembly inthlan neih a ni dawn a, hei vang hian Parliament session lai ni mah se politician tam zawk chu campaign-in an chhuah a rinawm a ni. Budget session thawh hnihna hian April 8 thleng a awh dawn ang. 

O'Brien chuan a hma pawhin assemly inthlan dawn vangin Parliament session hi tihtawp a lo ni tawh ṭhin tih sawiin, kum 2011 khan February 21-April 21 thleng session neih tur chu state panga inthlan dawn avangin March 25-ah tihtawp a ni, a ti. Kum 2008-ah pawh November 21 thlenga session neih tura duan tawh chu, state ṭhenkhata inthlan neih dawn avangin October 24-ah tihtawp a ni tawh bawk, tiin a sawi. Hei vang hian an ngenna thlen pawh hi ngaihtuahsak an nih ngei a beisei thu a tarlang. 

Nimina budget session thawh hnihna ṭan niah, eptu member-ten ram chhunga fuel man san belh zel duh lohna lantira an aubuai avangin Rajya Sabha rorel inkhawm chu Question Hour ṭan a nih hnu lawkah tihtawp a ni. 

Rajya Sabha-a leader of opposition, Congress MP Kallikarjuna Kharge chuan House rorel inkhawm titawp a, Rule 257 hnuaia fuel man sang chungchang debate neih an phut tih a sawi. "Petrol litre khat man Rs 100 dawn a ni tawh a, diesel pawh Rs 80 chuang niin, LPG cylinder man pawh a sang tawh hle. Kum 2014 aṭang khan heng aṭanga chhiah lak hi cheng vaibelchhe nuai 21 a tling tawh a ni. Chhiah lak tihsan a nih belh zel avangin ram mipuiten an tuar nasa tawh hle a ni," a ti. 

Mahse chairman chuan a ngenna hi hnawlsakin, hemi chungchang hi Appropriation bill sawinaah sawiho a nih tur thu a sawi. Hemi hnu hian eptu member-te chu lungawi loin an aubuai zui a, rorel thei loa an au zui vangin inkhawm hi titawp a ni ta a ni.