Covid-19 hri kai thar zinga 86.25% state paruk ami an ni

Union health ministry-in a tarlan danin, Pathianni khan ram chhungah Covid-19 hri kai hmuhchhuah thar mi 18,599 an awm a, ni thum chhung chu a zawnin hri kai thar hi nitin 18,000 chuang an awm leh tawh a ni. 

Hri kai thar zinga 86.25% hi state paruk - Maharashtra, Kerala, Punjab, Karnataka, Gujarat leh Tamil Nadu ami an ni. Maharashtra-ah hri kai thar hi 11,141 awmin, Kerala-ah 2,100 leh Punjab-ah 1,043 an awm. Sorkar laipui chuan tun hnaia hri kai pun tharna state leh Union territory-te chu an state dinhmunte thlirpuiin high-level review meeting a neihpui fo a, hri leng darh tur venna kawnga sorkar hmalakna enpui leh pui turin Maharashtra, Kerala, Chhattisgarh, Madhya Pradesh, Gujarat, Punjab, Karnataka, Tamil Nadu, West Bengal, leh Jammu and Kashmir-ah high-level team a lo tir tawh bawk. 

Health ministry chuan state/UT pariat - Maharashtra, Tamil Nadu, Punjab, Madhya Pradesh, Delhi, Gujarat, Karnataka leh Haryana-ah hri kai thar hi an pung chho tih sawiin, heng state-ah hian weekly positivity rate hi national average rate, 2.29% aiin an sang zawk a ni. Maharashtra chu weekly positivity rate sang ber niin, 11.13% a tling pha. 

Ram puma hri kai mek hi 1,88,747 awmin, hei hi hri kai hmuh chhuah tawh aṭanga 1.68% an ni. Pathianni khan Covid-19 hri vanga thi state leh UT-ah mi 97 an awm leh a, an zinga 38 chu Maharashtra state ami niin, Punjab-ah mi 17 leh Kerala-ah mi 13 an thi bawk. Hetihlai hian state/UT 18 zingah hemi ni hian hripui thihpui hi an awm lo thung.