Bihar-ah khaw lum vangin mi 130 an thi June 22 thleng zirna-in khar

Bihar state-ah chuan khaw lum lutuk avangin mi 130 an thi tawh a, sorkar chuan school leh college-te chu June 22 thleng khar turin thupek a tichhuak nghal. 

State chhunga khawpui lian zualahte chuan ni eng maw chen chu khaw lum hian zual lam a pan a, Patna leh Gaya-ahte chuan khaw lum lam hian 42.4 degree Celsius-te a tling pha a ni. Bhagalpur leh Purnea-ah pawh 41.6 leh 36.0 degree Celsius-te a tling. Gaya district magistrate Abhishek Singh chuan khaw lum lutuk avang hian Thawhṭanni khan district chhungah Section 144 a puang a, mipuite chu chawhma dar 11 aṭanga tlai dar 4 thleng pawn chhuak lo turin a ngen. Insakna hmuna hna thawh pawh chawhma dar 11 aṭanga tlai dar 4 thleng khap a ni bawk.

Bihar chief minister Nitish Kumar chuan khaw lum avanga thi an awm chu pawi a tih thu a sawi a, thi chhungte hnenah zángandawmna cheng nuai li ṭheuh pek an nih tur thu a puang. State sorkar chuan mipuite chu pawn lama an chhuah pawhin fimkhur turin a chah a, khaw lum zual lai chuan inchhung lama awm turin a ngen. 

Bihar state bakah hmarlam state dangah pawh kar thum chhung vel chu khaw lum a zual hle. Rajasthan leh Madhya Pradesh-ah pawh khaw lum lam hi 46 degree Celsius-te a kai a ni.