BJP-in LS Speaker candidate atan Om Birla a ruat

Bharatiya Janata Party (BJP) chuan kum 56  mi, BJP MP Om Birla chu Lok Sabha Speaker thlan turah National Democratic Alliance (NDA) candidate atan a ruat a, lungrual taka thlan tlin a nih ngei an beisei thu a sawi. 

Parliamentary Affairs Minister Pralhad Joshi chuan Lok Sabha Speaker atana Om Birla rawtna hi BJP hruaitu lawk pali, Prime Minister Narendra Modi telin an hming an sign hnan tawh tih a sawi. "Congress party pawh kan be tawh a, rawtna siamah hian an hming la sign lo mah se an dodal ka ring lo," a ti. 

Joshi chuan party dang 10 pawhin Birla hi an thlawp tih a sawi  bawk. Eptu party Telegu Desam Party, YSRCP leh BJP pawhin Birla hi an thlawp dawn tih an sawi. Lok Sabha Speaker atana BJP rawt hi party dangin thlawp lo mah se NDA hian seat 543 awmah seat 353 an neih avangin awlsam taka thlan tlin a ni dawn tho a ni. 

Om Birla hi Kota biala BJP MP term hnihna chelh mek a ni. Political party-te chuan a tlangpuiin speaker atan hian MP tawnhriat lo nei ṭha tawhte an thlang ṭhin. NDA sorkar hmasaa Lok Sabha speaker Sumitra Mahajan kha MP term riat hmang tawh a ni. Hetihlai hian Speaker atan hian MP term khat leh term hnihna hmang mek dah pawh an lo awm tawh tho a ni.