LS Speaker atan Om Birla thlang

17th Lok Sabha Speaker atan National Democratic Alliance (NDA) candidate BJP MP Om Birla chu nimin khan lungrual taka thlan a ni. 

Nimina Lok Sabha inkhawm­ah Lok Sabha Speaker atana Birla rawtna motion chu Prime Minister Narendra Modi-a'n a pu lut a, voice vote hmangin thlan a ni. Om Birla hi eptu party lian, Congress, Trinamool Congress leh Dravida Munnetra Kazhagam party pawhin an thlawp a ni. 

Speaker atana thlan tlin a nih hnuah PM Modi chuan Birla hi speaker chair a panpui a, a mipui rawngbawlna kawnga a hna lo thawh tawhahte a fak zui nghal bawk. PM chuan kum 2001-a Gujarat-a lirnghing vanga mi sang tel an thih ṭuma midangte ṭanpui hna thawka Birla-a'n Kutch-a thla eng emaw zat hun a hman dante a sawichhuak. Mipui rawngbawl chu Om Birla thil tum ber a ni tih a sawi. 

Lok Sabha-a Congress leader Adhir Chaudhary chuan speaker thar chu thlei bik nei lo rorel tura ngenin, eptu tan pawh an thil duh an auchhuahpui theihna tura hun pe ṭhin turin a ngen. Kum 56 mi, Om Birla hian commerce-ah Masters degree a nei a, zirlai pawl hruaitu a ni ṭhin. Rajasthan assembly member atan term thum thlan a ni tawh bawk. Kum 2004-2008 khan Rajasthan sorkar-ah parliamentary secretary a ni a, PM Modi leh Home Minister Amit Shah nen pawh inpawh tak an ni. 

Birla chuan Lok Sabha Speaker chu rorelna kawngah thlei bik leh duhsak bik nei tur a ni lo tih a sawi a, dan ang taka rorelna a kalpui tur thu leh,  member tinte an party len leh len loh lam teh loa ang khat veka en a, an duhdante a ngaihsak tur thu a sawi. PM Modi pawh fak zuiin, langtlang sorkar a siam avangin a fak a, sorkar thar chu a hma aia a mawhphurhna hlen zo, House-ah pawh chhanna pe thei zel a nih a duh thu a sawi. Birla chuan member tinte duhdan chu ngaihthlaksak a, sorkar pawhin a chhan zel a ngai a ni, a ti. House rorelnate tluang taka kalpui a nih ṭhin theihna turin member zawng zawngte thawhpuina a ngen nghal bawk. 

Kum 2014 khan a ṭum khatna atan Lok Sabha member atan thlan a ni a, kumin inthlanah khan Rajasthan-a Kota-Bundi bialah thlan tlin leh a ni. Inthlanah hian amah hnaih bertu Congress can­didate Ramnarayan Meena chu vote nuai 2.5 chuangin a hneh. 

Parliament member a nih hnuah rorel inkhawm pawh a tel ṭha hle a, a attendance hi 86% a tling. 16th Lok Sabha-ah khan rorel inkhawmah zawhna 671 a zawt a, debate 163-ah telin, private members' bill paruk a pulut bawk. 

Birla hi BJP youth wing, Bharatiya Janata Yuva Morcha (BJYM) ah national vice president a ni ṭhin a, Rajasthan-ah kum ruk chhung zet BJYM hotu hna a lo chelh tawh bawk. Social worker a ni a, hmeichhiate leh pianphunga rualbanlote tan a thawk ṭhin. 

Kum 2001-a Gujarat-a lir­nghing tuarte ṭanpuina hna thawk­tu 'relief team' pawh a lo ho tawh a ni.