Bihar CM-in hospital khum dah belh turin hriattir
Bihar state-a Àcute Encephalitis Syndrome (AES) vanga naupang 134 zetin nunna an chan hnuah, chief minister Nitish Kumar chuan Sri Krishna Medical College & Hospital (SKMCH) tlawhin tuna khum 610 awm mek chu khum 2500 awm theihna tura siam turin a hriattir. CM chuan khum 1500 dah belh tur chu a rang thei ang bera ruahman turin a hriattir nghal a ni.
CM Kumar chuan SKMCH hnenah AES enkawl mek chhungte awmna tur hmun pawh siam turin a hriattir bawk. Bihar chief secretary Deepak Kumar-a chuan doctor-te chuan damlo enkawlin theihtawp an chhuah tih a sawi a, he hospital-a doctor-te pui tur hian CM chuan Dharbhanga Medical College and Hospital leh Patna Medical College and Hospital-a doctor ṭhenkhat chu dah turin a ti bawk tih a sawi.
Deepak Kumar chuan an state-a AES leng mekah, nu leh pate chu an fate uluk taka enkawl turin a chah a, kaw ruaka mut tir lo tur leh, an nuamsam lo a nih chuan damdawi-in panpui vat turin a chah. ASHA worker, ANM leh Anganwadi worker-te pawh in tinah ORS semkual tura tirh an nih thu te, nu leh pate hnenah naupangte tana ORS a pawimawhziate hrilh zel tura hriattir an nih thu a sawi bawk.