Covid-19 : India-ah mi 28 in an vei tawh Mi 27,000 kan enfiah mek: Health Minister
India ramah novel coronavirus, Covid-19 vei finfiah mi 28 an awm tawh a, mahse heng zinga 16 hi Italy mi an ni thung. Union health minister Dr Harsh Vardhan chuan mi 27,000 chu enfiah mek an ni, a ti. Thawhṭanni khan mi paruk- New Delhi, Hyderabad leh Jaipur-a mite chuan an vei a ni tih finfiah a ni a, Thawhlehni khan Agra mi paruk finfiah an ni leh bawk.
International flight passenger enfiah vek dawn
Sorkar laipui chuan Covid-19 darh zel vangin International flight passenger zawng zawngte chu enfiah zel turin a ti a, Delhi sorkar hnenah pawh sorkar damdawi-in zawng zawngah isolation ward ṭha tawk tak siam turin a ti bawk.
Health minister Dr Harsh Vardhan chuan Covid-19 vei finfiah tawh mi 28 zinga 16-te chu Italy mi an ni a, India driver pakhat, Delhi mi pakhat, Agra mi paruk, Telangana mi paruk leh Kerala mi parukte an nih thu a sawi. Heng zinga Kerala mi pathumte chu enkawl dam an ni tawh a ni, a ti.
Thlawhtheihna passenger nuai 89 vel zet chu enfiah an ni tawh tih sawiin, Covid-19 vang hian laboratory 15 din a nih tawh bakah a dang 19 chu hman theih tura siam a nih tawh thu a sawi bawk. "Iran sorkarin min pui a nih chuan, an ramah testing facility kan dah thei a ni. Chumi hmang chuan an rama India mi awmte chu enfiah an nih hnuah hruai kir an ni thei ang. Iran-ah scientist pakhat kan tir tawh a, a dang pathum kan tir leh dawn bawk," tiin minister chuan a sawi.
India-a inbuatsaih ṭha : Amit Shah
Union home minister Amit Shah chuan Covid-19 darh zel tur venna atan India chu a inbuatsaih ṭha tih a sawi. Hemi chungchang hi a twitter-ah tarlangin mitinte chu hri leng darh zel lohna tura thil pawimawh zawm ngaite chu zawm ṭha turin a chah a, kut sil fai ṭhaa faina lam kawnga hma la turin a chah bawk. Amit Shah hian Holi Milan-a tel a tum loh thu sawiin, mipuite chu mipui punkhawmna reng reng pumpelh turin a chah a ni.
Holi Milan programme-ah PM tel dawn lo
Prime minister Narendra Modi chuan nimin khan Covid-19 darh zel lohna turin khawvel hmun hrang hranga mithiamte chuan mipui punkhawm titlem turin thurawn an pe tih sawiin, hemi avang hian Hoil Milan programme-a tel a tum pawh chu a ṭhulh ta tih a sawi.
BJP president JP Nadda pawhin Holi Milan buatsaih emaw Holi-a tel emaw chu a tum lo tih sawi ve bawkin, khawvelin Covid-19 a do mek a, anni pawhin chumi kawngah chuan hma an la ve tih a sawi a ni. Health ministry chuan Covid-19 laka invenna tur atana mipuite tana hriat tur pawimawh a tichhuak nghal.
Tih tur leh tih loh tur
a Sahbawn hmangin zing taka kut sil tur.
a Midang hnaih lutuka awm loh tur.
a Mit, hnar leh ka khawih loh hram tur.
a I khuh emaw i hahchhiauin emaw i kut emaw thildangin emaw i ka hup zel rawh.
a Khawsik, khuh leh thawk lama harsatna neih chuan a rang thei ang berin damdawia enkawlna pan tur.
a Fimkhur takin awm reng a, hriselna kawnga mi thiamte'n thurawn an pek chu zawm zel tur.